اسلام آباد۔ 15 جنوری (اے پی پی) وزیر خارجہ مخدوم شاہ محمود قریشی مقبوضہ جموں و کشمیر، ڈیہہ ٹی امن و ایمنی و ملکی سیاسی حالیت آتا بابت تینا بیان اٹی پارینے کہ پاکستان بھاز است جم ءِ کہ ہراہیت آتے نن تدوک آ اِراسال آن پارسا بسنہ اینو دنیا اوفتا تائید ءِ کننگ ءِ۔ جمعہ نادے آ تینا بیان اٹی اوپارے کہ نن بھلو وخت اسے آن مقبوضہ جموں و کشمیر اٹی برجا بھارتی ظلم ءِ مچ آ دنیا نا مون آ تالان کرسا بننگ اُن۔ اینو ہمو توار برطانوی پارلیمنٹ اٹ ہم بِننگ انگ ءِ، بھارت پروپیگنڈا کریکہ کہ دا اونا تہہ نا ویل اسے، برطانوی پارلیمنٹرینز آک پیدوار کرینو کہ دا جہانی کہول آ متنازعہ ءُ ویل اسے ہراڑآ سلامتی کونسل نا بھاز انگا قراردادآک ساڑی ءُ و دا بھارت نا تہہ نا معاملہ اس اسُل اف۔ وزیر خارجہ پارے کہ بھارت دنیا ءِ دا تاثر تسکہ کہ مقبوضہ جموں و کشمیر اٹی حالیت آک مست انا وڑمسنو وخت اس کہ برطانوی پارلیمنٹرینز بھارت نا دروغ دعویٰ تا پڑدہ ءِ پاش کرینو۔ اوپارے کہ بھارت اٹی حالیت آک بھاز نازرک ءُ، لکھ آ بھارتی فوج کشمیری تیا ظلم کننگ ءُ، مقبوضہ جموں و کشمیر اٹی ورناتے بے سوب دزگیر کننگ انگ ءِ و کمیونیکیشن نا بلیک آؤٹ ءِ۔ بے کنڈ ہلوک مبصر آتے مقبوضہ علاقہ غاتسکان رسینگ تفننگ انگ ءِ، جہانی میڈیا نا نمائندہ غاتے مقبوضہ کشمیر آ ہِننگ نا ہم موکل اف ، زالبول آتون بدسلوکی نا واقعہ غاک پدریسہ مننگ ءُ۔ شاہ محمود قریشی پارے کہ ہزار آتا کچ اٹی کشمیری پابند سلاسل ءُ و اوفتا ہچ ءُ شنوائی اس مفننگ ءِ۔ الحمداللہ اینو دا توار برطانیہ نا پارلیمنٹ آن بننگ ءِ، دایقینا ننا سفارتی نقطہ نظر نا سرسہبی ءِ۔ دا ہیت کشمیری تیکن است بڈی نا سوب ءِ دا توار آن بھارت نا چہرہ پین پاش مریک۔ اوپارے کہ امریکہ ٹی 20 جنوری آن امور حکومت سنبھالوک آ بائیڈن انتظامیہ ٹی بھاز انگا مخلوق ہرافتے اہم ءُ زمواری ملنگ نا گمان ءِ او دا ڈیہہ آن و کشمیری تیا کروک آ ظلم آن بلد ءُ۔ ننےاومیت ءِ کہ او کودک کشمیری تے بھارتی استبداد و مریس فوجی گھیڑ(ڈبل لاک ڈاؤن) آن نجات ترفنگ کن امریکی کانگریس اٹ توار بڑز کیرہ۔ وزیر خارجہ پارے کہ نن تو داتسکان پانہ کہ دنیا ننا و بھارت نا موقف ءِ اسہ کنڈ تخسا، تینٹ ہنسا راستکی تا جاچ ءِ ہلے۔ امریکی کانگریس، برطانوی پارلیمنٹ و یورپی پارلیمنٹ نا ڈل آک مقبوضہ کشمیر آ کار۔ انسانی حق انا بھلا خلاف ورزی و امن و ایمنی نا حالیت آتا تینٹ جاچ ءِ ہلیر و رپورٹ آتے تینا تینا پارلیمنٹ آتیٹی پیش کیر تانکہ اسل راستکی دنیانا مون آ بننگ کے۔ اوپارے کہ ننا پدریسہ کوشست مسنے کہ اوغانستان اٹی دیرپاامن مرے۔ پاکستان دا مچ آ عمل اٹ خیرخواہی نا کڑد ءِ ادا کرینے و کرسا کیک۔ بھارت اوغانستان اٹی امن نا کوشست آتیٹی اسہ سپائیلر نا کڑد ءِ ادا کننگ ءِ۔ اواوغان گل زمین ءِ پاکستان نا برخلاف کاریم اٹ اتنگ نا ناپاک کوشست کننگ ءِ۔ نن اوغان کمامدار آتے ہم داحالیت آتیان معلومدار کرینن و دا شاہدی تے دنیانا مون آ ہم پدریسہ تخنگ اُن۔ اوپارے کہ پی ڈی ایم نا تہہ ٹی انتشار آن نن بلد اُن۔ استیفہ غاتا معاملہ غا تہہ نا اختلاف ننا علم اٹی ءِ۔ مسلم لیگ نون نا تہہ ٹی چندی سلاک ننے آن ڈکھوک افس۔
