اسلام آباد۔ 15 جنوری (اے پی پی) صدر مملکت ڈاکٹر عارف علوی پارینے کہ پاکستان میکسیکو تون تینا تعلقداری تے بھاز اہمیت ایتک و تین پہ تینی است خواہی نا بشخ آتیٹی کمکاری ءِ پین ودفنگ خواہک، حکومت غٹ ملک آتون واپار و زرکاری ءِ ودفنگ آ چکار کننگ ءِ، داخیال آتا درشانی ءِ جمعہ نادے آ میکسیکو ٹی پاکستان نا پندار سفیر ڈاکٹر امان رشید تون ایوان صدر اٹی اوڑدہی ٹی کرے۔ ایوان صدر نا پریس ونگ آن جاری بیان نا رداٹ صدر عارف علوی پارے کہ پندار سفیر میکسیکو تون واپار، زرکاری، دودوربیدہ، سیل و سوات و تعلیم تون اوار چندی بشخ آتیٹی تعلقداری تے مون آ دننگ کن کوشست کے، پاکستان میکسیکو تون تینا تعلقداری تے بھاز اہمیت ایتک و تین پہ تینی است خواہی نا بشخ آتیٹی کمکاری ءِ پین ودفنگ خواہک۔ اوپارے کہ حکومت غٹ ملک آتون واپار و زرکاری ءِ ودفنگ آ چکار کننگ ءِ، میکسیکو تون تین پہ تینی واپار نا کچ اٹ ودکی نا گرج ءِ، ہڑتوم آ ملک آتا نیام اٹ بڑزکو کہولی دورہ غاتا بناءِ کننگ آن ہڑتوم آ کنڈآتا تعلقداری تے پین سوگوی رسینگک۔ اوپارے کہ پندار سفیر ملک انامثبت دروشم ءِ تالان کننگ و بھارتی مقبوضہ جموں و کشمیر اٹی مروک آ ظلم و انسانی حق آتا لتاڑتے پاش کننگ کن کاریم کے۔ صدر مملکت ڈاکٹر عارف علوی ڈاکٹر امان رشید ءِ میکسیکو ٹی پاکستان نا سفیر پندار مننگ آ مبارکبادی تس و اومیت ظاہر کرے کہ او ہڑتوم آ ملک آتا نیام اٹ تعلقداری تے پین سوگو کننگ اٹ اہم ءُ کڑد اس ادا کیک۔
