کوئٹہ۔ 14 جنوری (اے پی پی) وزیراعلیٰ بلوچستان جام کمال خان تون کوئٹہ ٹی چیئرمین ون مین کمیشن ڈاکٹر شعیب سڈل نا اوڑدہی۔ اوڑدہی ٹی صوبہ ٹی اقلیتی برادری نا عبادت گاہ تا سیکورٹی تون اوار ایلو باندات آ گپ وتران کننگا، وزیراعلیٰ بلوچستان جام کمال خان پارے کہ اقلیت آتا بلوچستان نا شونداری و شونہالی ٹی مدام اہم ءُ کڑد اس مسنے۔ و صوبائی حکومت اقلیت آتا حق انا رکھ و اوفتا راجی آسراتی ءِ خاص اہمیت ایتک اوڑدہی ٹی باسک قومی اسمبلی ڈاکٹر رمیش کمار، پارلیمانی سیکرٹری اقلیتی امور دنیش کمار وسیکرٹری اقلیتی امور عبدالفتح بھنگر اس ساڑی ئسر۔ وزیراعلیٰ بلوچستان پارے کہ اقلیت آتا حق انا رکھ، راجی و زرگزرانی گچینی کن گام گیج کننگ انگ ءِ اوپارے کہ سرکاری ملازمت آتیٹی اقلیت آتیکن جتا پنچ درسد کوٹہ غا عملدرآمد ءِ پک کننگانے۔ وزیراعلیٰ بلوچستان مستی پارے کہ اقلیتی برادری نا عبادت گاہ و راجی آسراتی نا ڈٹ آتیکن بھلو زر اس جتا کننگانے۔ ساڑی حکومت اقلیتی امور نا جتا ءُ محکمہ اس جوڑ کرینے۔ بروک آ پی ایس ڈی پی ٹی اقلیتی برادری کن پوسکن آ شونداری ڈٹ آتے اوار کینہ۔ اوپارے کہ بلوچستان اٹی بین المذاہب ہم آہنگی نا حالیت آک بے مٹ ءُ۔ چیئرمین ون مین کمیشن نا اقلیت آتا بابت حکومت بلوچستان نا کروک آتا گام گیج آتا ستا، سپریم کورٹ انا پرمان تا رداٹ ون مین کمیشن جنوری 2019اٹی جوڑ کننگاسس۔ ڈاکٹر شعیب سڈل اقلیتی برادری ہر ویل انا حالیت اٹ کمیشن تون رابطہ کننگ کیرہ۔
