ہڑدڑ تالان کننگ کن چمبازی کننگپ، کانود ءِ ملنڈی کننگ نا موکل تفنہ، ساڑی آ الیکشن کمیشن گچین کاری کرفتنے ہی تو برانز نا انت سوب اسے، بنجائی وزیر آتا اسیجائی پریس کانفرنس

اسلام آباد۔ 14 جنوری (اے پی پی) حکومت پیدوار کرینے کہ اپوزیشن بے شک برانز کے ولے کانود ءِ ملنڈی کننگ نا موکل تفنہ، ہڑدڑ تالان کننگ کن چمبازی کننگپ، عمران خان اسُل اسرائیل ءِ امنا کپک، مدرسہ غاتا طالب علم آتے ہشکا تننگ کن خارتس نعرہ خلنگپ، ساڑی آ الیکشن کمیشن گچین کاری کرفتنے تو برانز نا انت سوب اسے، اپوزیشن اسہ ادارہ اسے نا تو جان ءِ ہلے۔ مولانا فضل الرحمان اسلام آباد نا کنڈآآخا اسلام نا کنڈآ اُرے۔ داخیال آتا درشانی ءِ بنجائی وزیر آک پنچ شنبے نادے آ داڑے وزارت داخلہ ٹی اسیجائی پریس کانفرنس آن تران کرسا کریر۔ بنجائی وزیر داخلہ شیخ رشید احمد پارے کہ وزیر آتا دیوان اٹی امن و ایمنی نا حالیت آتا جاچ ءِ ہلنگانے۔ اوپارے کہ وزیراعظم پاکستان ءِ تینا پڑو نا رداٹ مدینہ نا ریاست طرز آ جوڑ کننگ نا خواہندار ءِ۔ نن دینی قوت آتا شرف ءِ کینہ و مدرسہ غاتے اسلام نا قلعہ و مینار سمجھنہ۔ اوپارے کہ بنجائی دارالحکومت اٹی 560 مدرسہ ءُ ہرافتیان بیرہ 92 رجسٹرڈ ءُ، وزراء کمیٹی نا دیوان اٹی اہم فیصلہ کرینے وخت اس کہ وزیر کانود فروغ نسیم ہم اہم کانودی مشورہ تسنے۔ اوپارے کہ 19 جنوری آ اپوزیشن جماعت آک الیکشن کمیشن برانز کننگ بننگ ءُ، الیکشن کمیشن اسہ آئینی ءُ ادارہ اسے ، اگہ داڑآ اعتراض ارے تو اونا ہچ ءُ جواز اس اف۔ہرا اسمبلی نا برخلاف برانز کننگ کن ہِننگ ءُ ہمو اسمبلی ٹی گچین کاری تیٹی بشخ ہم ہلنگ ءُ۔ گچین کاری اصلاحات نا کنڈآ بفسہ ۔ وزیر داخلہ پارے کہ مارچ اٹی سینیٹ گچین کاری تیٹی ہم اپوزیشن بشخ ہلیک، نن اومیت کینہ کہ اپوزیشن امن و ایمنی نا ویل ءِ ودی کپک، فارن فنڈنگ کیس انا سماعت نا وخت آ آئین و کانود نا دنگ اٹ سلسا برانز کننگک و حکومت نا امن نا خواہش ءِ خراب کننگپک۔