وزیراعظم عمران خان تون آذربائیجان نا وزیر خارجہ نا اوڑدہی، ہڑتوم آ کنڈآتا تعلقداری و علاقائی و جہانی امور آ گپ وتران

اسلام آباد۔ 14 جنوری (اے پی پی) وزیراعظم عمران خان تون آذربائیجان نا وزیر خارجہ صبح جیہون بیراموف پنچ شنبے نادے آ داڑے اوڑدہی کرے و ہڑتوم آ کنڈآتا تعلقداری و علاقائی و جہانی باندات آ گپ وتران کریر۔ وزیراعظم آذربائیجان نا سرکڑدہ و الس ءِ مقبوضہ علاقہ ءِ آجو کرفنگ آ مبارکبادی تس و آجوکرفوک آ علاقہ غاتا تعمیر نو و شونداری ٹی پاکستان نا پبی کمکاری نا باوری کرفے۔ وزیراعظم میڈیا آفس آن جاری بیان نا رداٹ اوڑدہی ٹی وزیراعظم گچین ہڑتوم آ کنڈآتا سیاسی تعلقداری آ است جمی نا درشانی ءِ کرے و واپار و توانائی نا بشخ آتیٹی کمکاری ءِ مون آ دننگ نا اہمیت آ زور شاغا۔ وزیراعظم آجو کرفوک آ علاقہ غاتا تعمیر نو و شونداری کن آذربائیجان نا خواست آ پاکستان نا کنڈآن ہروڑنا امداد نا باوری کرفے۔ آذربائیجان نا وزیر خارجہ آذربائیجان نا صدر الہام علیوف نا کنڈآن وزیراعظم ءِ نیک است خواہی نا کلہو ءِ سرکرے و نگور نوکاراباخ نا جھیڑہ غا پاکستان نا کنڈآن پدریسہ مخ تفی آ منت واری ءِ ہرفے و جموں و کشمیر نا جھیڑہ غاآذربائیجان نا کنڈآن پاکستان نا پدریسہ مخ تفی و یکجہتی نا درشانی ءِ کرے۔ اوغٹ بشخ آتیٹی ہڑتوم آ کنڈآتا کمکاری ءِ مون آ دننگ نا است خواہی نا درشانی ءِ کرے۔