اسلام آباد۔ 14 جنوری (اے پی پی) بنجائی وزیر مذہبی امور پیر نورالحق قادری تون پاکستان اٹی ایران نا سفیر سید محمد علی حسینی وزارت مذہبی امور اٹی اوڑدہی کرے۔ ہڑتوم آ کڑدہ غاک ایران پاکستان ہڑتوم آ کنڈآتا تعلقداری، مذہبی دودوربیدہ ئی بشخ آتیٹی کمکاری و دشمن واکدار آتا برخلاف اسلامی ملک آتا سیوت و سخا ءِ سوگو کننگ تون اوار ایلو امور آ گپ وتران کریر۔ اوڑدہی ٹی ہڑتوم آ ملک آتا نیام اٹ مذہبی سیل و سوات نا مون آ دننگ آ ہم گپ وتران کننگا۔ اسلامی جمہوریہ ایران نا الس کن پاکستانی الس نا لازم و ملزوم سنگتی و مہرومریبت آ زور شاغسا وزیر مذہبی امور پیر نورالحق قادری پارے کہ ایران و پاکستان مدام ہرحالیت اٹ اوار تفوک ءُ۔ اوپارے کہ پاکستان اٹی فرقہ واریت ءِ ہشکا تننگ و ملک اٹی شیعہ سنی پھسات آتا کوشست کروک آ سوب آتا برخلاف حکومت و مذہبی تپہ دمدستی وڑاٹ گام گیج کرے۔ دُن تو گڑاس عوامی راج اٹی تناؤنا سوب مسر، ولے خوش بختی اٹ پاکستانی عالم دینک او سازش ءِ بے سہب کریر۔ پاکستان اسلامی ملک آتا نیام اٹ مدام اخوت، سنگتی و اعتدال ءِ مون آ دننگ نا کوشست کرینے و وزیراعظم عمران خان ہم ہندا طرزعمل تون بے چیٹی تے کم کننگ اٹ کمک کننگ نا کوشست کرے۔ ایران و سعودی عرب نا نیام اٹ ثالثی نا بنداوی مسخت دشمن تا فائدہ غاتے توننگ ءِ۔ اومستی پارے کہ ایران وپاکستان نا نیام اٹ وخت اس کہ اسُل جھیڑہ متنے و اگہ غلط گمانی اس ہم مسنے تو ہڑتوم آ ملک آک ایلم و اسہ خاہوت نا باسک اسے نا وڑاٹ دمدستی و تعمیری ایسراسکان سرمننگ نا کوشست کرینو۔ قرآن آن راہشونی و سیوت نا مون آ دننگ آ السی بیداری کن اواری اٹ کاریم کینہ۔ ایران عراق کن پوسکن آ زیارت پالیسی نا مسودہ پاکستانی حکومت نا کابینہ ٹی زیر غور ءِ، واومیت ءِ کہ بروک آ ہفتہ دانا منظوری ءِ تننگک۔ پوسکن آ پالیسی نا اصل مسخت پاکستانی تا ایران و عراق نا زیارت ءِ آسان کننگ نا ءِ، خاص وڑاٹ زمینی کسر آن ہنوک آ زائر آتا خذمت کن ایران نا پین کمک و مدت نا چاری اُن۔ داوخت آ ایرانی سفیر پارےکہ پاکستان و ایران ہڑتوم آک دا سمجھرہ کہ ساڑی آ متنازعہ فلم لیڈی آف ہیون مسلم امہ نا سیوت نا برخلاف اسہ سازش اسے۔ دارداٹ ہڑتوم آ ملک آک پدریسہ رابطہ ٹی ءُ و نن وزیراعظم پاکستان آن سفارئی ذریعہ اٹ برطانوی حکومت تون داویل ءِ ہرفنگ نا پارینن۔ سفیر مستی پارے کہ 35 سال مست 13 جنوری آ اسلامی جمہوریہ ایران نا صدر نا حیثیت اٹ آیت اللہ خامنہ ای نا تاریخی دورہ پاکستان آ بس و لاہور اٹی اونا تقریر یات گار ءِ۔
