اسلام آباد۔ 14 جنوری (اے پی پی) وزیراعظم عمران خان نا کماشی ٹی پاکستان تحریک انصاف نا حکومت ملک اٹی شونداری و شونہالی نا ڈٹ آتا جال اس تالان کرے و ملک اٹی پدسلوک علاقہ غاتا شونداری کن اولیتی بنداو تیا گام گیج آتا چرجوئی نا بناءِ کرینے ہراڑآن خاص وڑاٹ سویلی بلوچستان نا 10 ضلع غاتا الس شونہالی نا بھرم تیان فائدہ ہرفرہ ہرافتے مستین نا حکومت آک گوجالاسر وزارت ڈٹ بندی، شونداری، اصلاحات و خصوصی گام گیج نا کمامدارآتا رداٹ’’وزیراعظم نا پوسکن آ پاکستان شونہال سویلی بلوچستان‘‘ پروگرام کن 600 ارب روپئی نا شونداری ڈٹ آتا بناءِ کننگک۔ وزارت دا پروگرام کن جامع ڈٹ بندی کرینے ہرانا رداٹ آواران، چاغی، لسبیلہ، پنجگور، واشک، کیچ، تربت، خاران، خضدار و گوادر نا ضلع غاتا 36 لکھ آبادی کن خصوصی پیکج نا فراوانی نا بناءِ کرینے۔ دا پیکج نا رداٹ 1100 کلومیٹر سڑک آتا تفنگ آن ہندی آبادی کن آسان نقل و حمل و منڈی تسکان رسینگ دوئی مریک۔ 3 لکھ آن زیات اُراتے بجلی و 100 درسد اُراتے گیس انا فراوانی ءِ پک کننگک۔ 16 پوسکن آ ڈیم تا تفنگ آن اسہ لکھ 50 ہزار مربع ایکڑ ودکی بنجرڈغار ءِ دسنگ نا قابل جوڑ کننگک، اسہ لکھ آن زیات ہندی مخلوق ءِ روزگار نا وارخواہی دُوبریک۔ 80 ہزار آن زیات چناتے وسیلہ تعلیم نا کمک اٹ اسکول آتیٹی درج کننگک۔ اے ایس پی آئی آر ای پروگرام نا رداٹ 6 لکھ آن زیات چناتیکن انٹرنیٹ نا کمک اٹ تعلیم نا آسراتی مہیا کننگک۔ 5 لکھ بندغ آتیکن انٹرنیٹ آسراتی نا فراوانی، 35 ہزار ورناتے گچین روزگار کن آئی جی این آئی ٹی ای پروگرام نا رداٹ انفارمیشن ٹیکنالوجی نا تربیت تننگک۔ ہر سال 150 ہندی نرسنگ اسٹاف ءِ ودفنگک۔ 25 ہزار ودکی خاہوت نا غیر مشروط فراوانی ءِ پک کننگک۔ ماہی گیری و کشتی جوڑ کننگ کن تربیت و کشتی تا ہلنگ کن وام تا فراوانی ہم کننگک۔ کمامدارآتارداٹ اِلار تا پراسیسنگ و زیتون نا تیل کشنگ نا یونٹ آتے جوڑ کننگک، واپار نا مون آ دننگ کن 6 بارڈر مارکیٹ جوڑ کننگک و معدنیات نا صنعت کن تکنیکی امداد تننگک۔
