پاکستان و آذربائیجان نا اقتصادی و توانائی بشخ اٹی ہڑتوم آ کنڈآتا کمکاری تون اوار زمینی و فضائی رابطہ غاتے ودفنگ آ امنا

اسلام آباد۔ 14 جنوری (اے پی پی) پاکستان و آذربائیجان اقتصادی و توانائی نا بشخ اٹی ہڑتوم آ کنڈآتا کمکاری تون اوار زمینی و فضائی رابطہ غاتے ودفنگ آ امنا کرینو۔، پاکستان و آذربائیجان نا نیام اٹ پنچ شنبے نادے آ وزارت خارجہ ٹی ڈل آتا کہول آ مذاکرات مس۔ پاکستانی ڈل انا کماشی ءِ وزیر خارجہ مخدوم شاہ محمود قریشی وخت اس کہ آزری ڈل انا کماشی ءِ آذربائیجان نا وزیر خارجہ جیہون بیراموف کریکہ۔ مخدوم شاہ محمود قریشی پارے کہ پاکستان و آذربائیجان نا نیام اٹ اسہ وڑ مذہبی، دودوربیدہ ئی قدر انا بنداو آ برادرانہ تعلقداری ءِ۔ شاہ محمود قریشی پارے کہ ای آرمینیا نا نارواکوزہ غان آذربائیجان نا علاقہ غاتے آجو کرفنگ آ آذربائیجان نا حکومت و الس ءِ مبارکبادی ایتیوہ۔ ننا جہانی کہول آ پیدوار موقف مسنے کہ آذربائیجان نا علاقائی سالمیت نا رکھ ءِ پک کننگے۔ اوپارے کہ وزیراعظم عمران خان نا وژن نا رداٹ آذربائیجان تون اقتصادی تعلقداری ٹی ودفنگ نا خواہندار اُن۔ دا مذاکرات اٹی پاکستان و آذربائیجان نا نیام اٹ اقتصادی، واپاری، دفاعی کمکاری نا مون آ دننگ تون اوار تعلیم، دودوربیدہ و ٹیکنالوجی نا بشخ آتیٹی ہڑتوم آ کنڈآتا کمکاری ءِ ودفنگ کن چندی پلو آتیا گپ وتران کریر۔ ہڑتوم آ وزیر خارجہ غاک اقتصادی کمکاری خاص کر توانائی نا بشخ اٹی ہڑتوم آ کنڈآتا کمکاری ءِودفنگ نا گرج آ زورشاغار، سائنس و کشت وکشار نا بشخ آتیٹی ہم ہڑتوم آ کنڈآتا کمکاری ءِ ودفنگ آ سجفیر۔ شاہ محمود قریشی پارے کہ پاکستان، السی کہول آ رابطہ غاتا مون آ دننگ و واپاری کمکاری ءِ ودفنگ کن پوسکن آ ویزہ پالیسی نا بناءِ کرینے۔ کورونا جہانی دین مچ آ دنیا نا زرگزران ءِ بھس کرینے پدتموک ملک آتیکن دا دین انا زرگزرانی زہم تتون مون تننگ بھاز سخت ءِ۔ نن کورونا دین انا زرگزرانی زہم تتون مون تننگ و لس بندغ نا آسراتی کن ’’سمارٹ لاک ڈاؤن‘‘ نا حکمت عملی ءِ اختیار کرین ہرانا جہانی کہول آ است بڈی مسنے۔ ہڑتوم آ وزیر خارجہ غاک کورونا جہانی دینی چیلنج نا زہم تتون مون تننگ کن اسیجائی کوشست آتے کاریم اٹ اتنگ آ امنا کریر۔ شاہ محمود قریشی پارے کہ پاکستان و آذربائیجان نا نیام اٹ بڑزکو کہولی ڈل آتا ہن و برآن ہڑتوم آ کنڈآتا تعلقداریک پین سوگو مسر۔ ہڑتوم آ وزیر خارجہ غاتا نیام اٹ پاکستان و آذربائیجان نا نیام اٹ زمینی و فضائی رابطہ غاتے ودفنگ آ امنا کننگا۔ وزیر خارجہ بھارت نا کنڈآن مقبوضہ جموں و کشمیر اٹی برجا انسانی حق انا بھلا خلاف ورزی، بھارتی ریاستی دہشت گردی نا بابت آذری تینا ہم منصب ءِ معلومدار کرسا، جہانی برادری نا کنڈآن کڑد ادا کننگ نا گرج آ زور شاغا۔ وزیر خارجہ کشمیر نا ویل انا بابت آذربائیجان نا کنڈآن پدریسہ مخ تفی آ آذربائیجان نا وزیر خارجہ نا منت واری ءِ ہرفے۔ ہڑتوم آ وزیر خارجہ غاک جہانی فورم تیا اسہ ایلو نا کمک و مخ تفی آ است جمی نا درشانی ءِ کریر۔ آذربائیجان نا وزیر خارجہ جم و جوش اٹ بیابخیری و مہمانداری آ وزیر خارجہ مخدوم شاہ محمود قریشی نا منت واری ءِ ہرفے۔