اسلام آباداٹی پاکستان، آذربائیجان مذاکرات آن مسہ بشخ آتیٹی تعلقداری و کمکاری ءِ مون آ دننگ دوئی مریک، صدر مملکت ڈاکٹر عارف علوی

اسلام آباد۔ 14 جنوری (اے پی پی) صدر مملکت ڈاکٹر عارف علوی پاکستان و آذربائیجان نا نیام اٹ واپاری کچ ءِ ودفنگ و دودوربیدہ و واپاری کمکاری ءِ پین مون آ دننگ نا گرج آ زور شاغسا دااومیت نا درشانی ءِ کرینے کہ اسلام آباد اٹی پاک، آذربائیجان،ترکی سہ کڑدہ ئی مذاکرات آن سہ رخی تعلقداری و برادر ملک آتا نیام اٹ کمکاری ءِ مون آ دننگ دوئی مریک۔ داخیال آتا درشانی ءِ او آذربائیجان نا وزیر خارجہ جیہون بیراموف تون گپ وتران کرسا کرے ہرا پنچ شنبے نادے آ داڑے ایوان صدر اٹی اوڑتون اوڑدہی کرے۔ صدر مملکت پارے کہ پاکستان آذربائیجان تون تینا تعلقداری تے قدر انا نظراٹ ہرک ہرا اسیجائی عقیدہ، تاریخی و دودوربیدہ ئی رابطہ غاتیاٹی ءُ، صدر عارف علوی نگورنوکاراباخ نا آجوئی آ آذربائیجان نا حکومت و الس ءِ مبارکبادی تس۔ اوپارے کہ پاکستان آذربائیجان نا علاقائی سالمیت نا مخ تفی ءِ کیک۔ صدر مملکت پارے کہ ہڑتوم آ ملک آتا نیام اٹ واپاری کچ ءِ ودفنگ و دودوربیدہ ئی و واپاری کمکاری ءِ پین مون آ دننگ نا گرج ءِ، اومیت ءِ کہ اسلام آباد اٹی پاک، آذربائیجان، ترکی سہ کڑدہ ئی مذاکرات آن سہ رخی تعلقداری و برادر ملک آتا نیام اٹ کمکاری ءِ مون آ دننگ دوئی مریک۔ صدر مملکت کشمیر آ او آئی سی رابطہ پڑک نا باسک انا حیثیت اٹ آذربائیجان نا کڑد انا ستاءِ کرے۔ داوخت آ آذری وزیر خارجہ نگورنوکاراباخ آ آذربائیجان ناموقف نا مخ تفی ءِ کننگ آ پاکستان نا منت واری ءِ ہرفے۔ اوپارے کہ آذربائیجان کشمیر نا ویل آ غٹ جہانی فورم تیا پاکستان تون ہم کوپہ سلک۔ جیہون بیراموف پارے کہ پاکستان و آذربائیجان نا نیام اٹ واپاری و دودوربیدہ ئی کمکاری ٹی ودکی نا لائخی ساڑی ءِ۔