صوابی۔ 13 جنوری (اے پی پی) اسپیکر قومی اسمبلی اسد قیصر پارینے کہ کورونا نا تالانی ءِ توننگ کن پاکستان نا حکمت عملی سرسہب مسنے، الس نا پبی کمک اٹ دا ممکن مس، وزیراعظم عمران خان و اونا ٹیم انا خواری نا سوب آن پاکستان نا زرگزران اٹی گچینی بسنے، ورلڈ اکنامک فورم تون اوار دنیا نا ایلو ادارہ غاک پاکستان نا زرگزران نا گچینی نا سفت ءِ کننگ ءُ، داوخت آ ملک اٹی متوسط تپہ برسراقتدار ءِ، نن الس نا اومیت آتیا پورو سلنہ۔ داخیال آتا درشانی ءِ او چارشنبے نادے آ داڑے باچاخان میڈیکل کمپلیکس اٹی نرسنگ و دینی مرض آتا انسٹی ٹیوٹ نا بنداو ءِ تخنگ نا دود آن تران کرسا کرے۔ داوخت آ وزیراعلیٰ خیبرپختونخوا محمودخان ہم ساڑی ئسک۔ دود آن تران کرسا اسپیکر قومی اسمبلی پارے کہ وزیراعلیٰ خیبرپختونخوا نا الس نا کنڈآن منت وار اُٹ۔ اوپارے کہ کورونا نا اولیکوریسہ دنیا ٹی تباہی کرینے ہراڑآن امریکہ و یورپ اٹی بھلو کچ اسے آ جانی نسخان مس۔ اوپارے کہ پاکستان نا جامع حکمت عملی آن ننے مہالو ہم اللہ سرسہبی تس و داسہ ہم کورونا نا تالانی ءِ توننگ کن کوشست کننگ اُن۔ اوپارے کہ کورونا نا تالانی ءِ توننگ کن پاکستان نا حکمت عملی سرسہب مسنے، الس نا پبی کمک اٹ داممکن مس۔ اوپارے کہ کورونا نا حالیت آتون اوار اوار ننے زرگزران نا چیلنج آتا ہم مون تروک ئس، داسہ ملکی زرگزران گچینی نا کنڈآ ہِننگ ءِ۔ کورونا غان بھارت و ہمسایہ ملک آتیٹی زرگزران بھاز زہمی مس۔ ہمیڑے لکھ آ بندغ آک بے روزگار مسر وخت اس کہ پاکستان اٹی وزیراعظم عمران خان و اونا ٹیم انا خواری نا سوب آن حالیت آک گچین مسنو۔ اوپارے کہ اسد عمر واین سی او سی وخت آ فیصلہ کریر، مہالو ہم نن کورونا نا ریسہ نا مون ءِ تورین۔ داسہ ہم انشاء اللہ حالیت آک گچین مریرہ۔ جہانی ادار جان جوڑی و دنیا ننا حکمت عملی نا سفت ءِ کننگ ءُ۔ اوپارے کہ پاکستان نا زرگزران گچین مننگ ءِ، ورلڈ اکنامک فورم تون اوار ایلو ادارہ غاک ننا زرگزران نا گچینی نا سفت ءِ کننگ ءُ۔ اوپارے کہ صوابی نا شونداری کن نن بھاز انگا ڈٹ آتا بناءِ کرینن، اللہ پاک متوسط تپہ ءِ اقتدار تسنے، نن الس نا اومیت آتیا پورو سلنہ۔
