اسلام آباد۔ 13 جنوری (اے پی پی) صدر مملکت ڈاکٹر عارف علوی ترک وزیر خارجہ میولودچاوش اولو ءِ پاک ترک تعلقداری تا سوگوی نا امنائی ٹی ارٹ میکو بڑزکو انگا سول ایوارڈ ہلال پاکستان اس تس۔ ایوارڈ تننگ نا دود چارشنبے نا سہب اتون داڑے ایوان صدر اٹی مس ہراٹی ترک وزیر خارجہ تون اوار بروک آ ڈل آن بیدس بنجائی وزیر آک و سول کمامدارآک ساڑی ئسر۔ دود انا بناقرآن پاک آن مس اوکان پد ہڑتوم آ ملک آتا قومی ترانہ ءِ خلنگا۔ داوخت آ سیکرٹری کابینہ ڈویژن سردار احمد نواز سکھیرا ہڑتوم آ کنڈآتا تعلقداری نا سوگوی کن ترک وزیر خارجہ نا خذمت آتے تالان کرے۔ اوپارے کہ ترک وزیر خارجہ امن و سلامتی کن نمان گام گیج کرے و پاک ترک تعلقداری تا سوگوی و دا تعلقداری تے اسٹریٹجک شریداری ٹی بدل کننگ کن اہم کڑد ادا کرے۔ ہلال پاکستان نا ایوارڈ پاکستان نا قومی مفاد، شاندار دودوربیدہ و راجی خذمت آتا اعتراف اٹ تننگک۔ داتم اسکان ہرا درملکیک دا اعزاز ءِ دوئی کریر اوفتے ٹی پوسکن گچین مروک آ امریکی صدر جوبائیڈن، چینی وزیر خارجہ وینگ ژی و پاکستان کن مسکوہی چینی سفیر یاؤ جن اوار ءُ۔ ترک وزیر خارجہ ارٹ میکو پاک ترک آذربائیجان سہ کڑدہ ئی دیوان اٹی بشخ ہلنگ کن پاکستان آ بسنے۔ ہلال پاکستان نا اعزاز نا دود آن مست ترک وزیر خارجہ صدر مملکت تون اوڑدہی کرے و تین پہ تینی است خواہی نا باندات آ گپ وتران کریر۔
