پاکستان و ترکی جہانی کہول آ تین پہ تینی است خواہی نا امور آ اسیجائی لائحہ عمل اس اختیار کننگ آ امنا کرینو، ترجمان دفترخارجہ

اسلام آباد۔ 13 جنوری (اے پی پی) پاکستان و ترکی ہڑتوم آ کنڈآتا کمکاری ءِ پین سوگو کننگ کن جہانی کہول آ تین پہ تینی است خواہی نا امور آ اسیجائی لائحہ عمل اس اختیار کننگ و اسیجائی کوشست آتے کاریم اٹ اتنگ آ امنا کرینو۔ ترجمان دفترخارجہ نا رداٹ وزیر خارجہ مخدوم شاہ محمود قریشی تون اونا ترک ہم منصب مولودچاوش اولو چارشنبے نادے آ وزارت خارجہ ٹی اوڑدہی کرے۔ اوڑدہی ٹی ہڑتوم آ کنڈآتا کثیر الجہتی تعلقداری، اہم علاقائی و جہانی امور تون اوار تین پہ تینی است خواہی نا باندات آ گپ وتران کننگا۔ ہڑتوم آ وزیر خارجہ غاک پاکستان و ترکی نا نیام اٹ ہڑتوم آ کنڈآتا تعلقداری نا وڑآ است جمی نا درشانی ءِ کرسا بڑزکو کہولی اسٹریٹجک کوآپریشن کونسل نا اسلام آباد اٹی اڈ ہلوک آ دیوان اٹی کروک آ فیصلہ غاتیا زوت عملدرآمد ءِ پک کننگ آ امنا کریر۔ ہڑتوم آ وزیر خارجہ غاک پاکستان و ترکی نا نیام اٹ 71 ٹکی اسٹریٹجک اکنامک فریم ورک آ زوت عملدرآمد ءِ پک کننگ نا گرج آ زور شاغار۔ وزیر خارجہ ترک ہم منصب ءِ بھارتی کوزہ گیر فوج انا کنڈآن، مقبوضہ جموں و کمشیر اٹی برجا انسانی حق انا بھلا خلاف ورزی و ڈیہہ ءِ مون تروک خطرہ غاتیان معلومدار کرے۔ وزیر خارجہ کشمیر نا ویل انا بابت ترکی نا بدل مفروک مخ تفی آ ترک وزیر خارجہ نا منت واری ءِ ہرفے۔ وزیر خارجہ اوغانستان اٹی امن کن پاکستان نا خیرخواہی کوشست و اوفتا بھرم تیان ترک وزیر خارجہ ءِ معلومدار کرے۔ شاہ محمود قریشی پارے کہ اقوام متحدہ، او آئی سی، ای سی او تون اوار جہانی کہول آ ہڑتوم آ ملک آتا نیام اٹ نقطہ نظر اٹ مماثلت ستاکڑزک۔ ہڑتوم آ وزیر خارجہ غاک ہڑتوم آ کنڈآتا کمکاری ءِ پین سوگو کننگ کن جہانی کہول آ تین پہ تینی است خواہی نا امور آ اسیجائی لائحہ عمل اس اختیار کننگ و اسیجائی کوشست آتے کاریم اٹ اتنگ آ امنا کریر۔ ہڑتوم آ وزیر خارجہ غاک جہانی کہول آ اسلامو فوبیا نا ودوک آ رجحان آ گڑتی نا درشانی ءِ کرسا،اسلامی قدر انا رکھ اکن اسیجائی لائحہ عمل اختیار کننگ نا گرج آ زور شاغار۔ ترک وزیر خارجہ مولود چاوش اولو ترکی نا چندی امور آ پاکستان نا مخ تفی و کمکاری آ وزیر خارجہ مخدوم شاہ محمود قریشی نا منت واری ءِ ہرفے۔