اسلام آباد۔ 13 جنوری (اے پی پی) ترک وزیر خارجہ مولودچاوش اولوچارشنبے نادے آ اِرادے ئی دورہ غا پاکستان آ سرمس۔ وزارت خارجہ غا بننگ آ وزیر خارجہ مخدوم شاہ محمود قریشی ترک وزیر خارجہ ءِ جم وجوش اٹ بخیر کرے۔ ترک وزیر خارجہ وزارت خارجہ نا لان اٹ نیال اس خلک۔ ترکی نا وزیر خارجہ مولود چاوش اولو تینا دادورہ ٹی وزیر خارجہ مخدوم شاہ محمود قریشی، وزیراعظم عمران خان تون اوار بڑزکو سرکڑدہ غاتون اوڑدہی کیک۔ دا اوڑدہی تیٹی پاکستان و ترکی نا نیام اٹ ہڑتوم آ کنڈآتا تعلقداری و چندی بشخ آتیٹی ہڑتوم آ کنڈآتا کمکاری تون اوار تین پہ تینی است خواہی نا باندات آ سرجم گپ وتران کننگک۔ تدوک آ دونیم سال اٹی ترک وزیر خارجہ نا دا مسٹ میکو دورہ پاکستان ءِ، ہرا داہیت انا شاہدی ءِ کہ ہڑتوم آ ملک آتا نیام اٹ ہڑتوم آ کنڈآتا دیرینہ تاریخی، دودوربیدہ تعلقداری تین پہ تینی پت و وقار آ جوڑ ءِ۔ ترک وزیر خارجہ ءِ سہب اتون صدر پاکستان ڈاکٹر عارف علوی اسہ خصوصی ءُ دود اسے ٹی سول ایوارڈ تس اینو پاکستان ترکی و آذربائیجان نا نیام اٹ سہ کڑدہ ئی مذاکرات نا مسٹ میکو ریسہ نا بنامریک۔ دا سہ ملکی مذاکرات اٹی ترک، آذربائیجان و پاکستان نا وزیر خارجہ غاک تینا تینا ڈل آتا کماشی ءِ کیرہ۔
