اسلام آباد۔ 12 جنوری (اے پی پی) وزیر خارجہ مخدوم شاہ محمود قریشی پارینے کہ نن بین الاوغان مذاکرات اٹی طے کروک فیصلہ غاتا ستاءِ کینہ۔ پاکستان و اوغانستان نا نیام اٹ ہڑتوم آ کنڈآتا واپار نا مون آ دننگ کن عملی گام گیج کننگ اُن۔ ڈیہہ ٹی امن و سوگوی اوغانستان اٹی دیرپا امن تون گنڈوک ءِ۔ داہیت آتے او اوغان حزب وحدت اسلامی نا راہشون محمد کریم خلیلی تون گپ وتران کرسا پارے، ہرا ڈل اتون اوار سے شنبے نادے آ وزارت خارجہ ٹی اوڑتون اوڑدہی کرے۔ ترجمان دفتر خارجہ نا رداٹ اوڑدہی ٹی اوغان امن عمل تون اوار تین پہ تینی است خواہی نا اہم باندات آ گپ وتران کننگا۔ سیکرٹری خارجہ سہیل محمود، نمائندہ خصوصی اوغانستان ایمبیسیڈر محمد صادق و وزارت خارجہ نا سینئر آفیسر آک ہم داوخت آ ساڑی ئسر۔ شاہ محمود قریشی کریم۔ خلیلی و ڈل ءِ وزارت خارجہ غا بننگ آ بخیر اٹ پارسا پارے کہ پاکستان و اوغانستان نا نیام اٹ تاریخی و اسہ وڑ دودوربیدہ و تہذیبی قدر آ استوار برادرانہ تعلقداری ءِ۔ مخدوم شاہ محمود قریشی پارے کہ پاکستان نا اولیکو دے آن ہندا موقف مسنے کہ اوغان ویل انا ہچ ءُ فوجی ایسری اس اف۔ اوغان سرکڑدہ ءِ قابل قبول جامع سیاسی مذاکرات داویل انا اسٹ انگا ایسرءِ۔ پاکستان اوغانستان اٹی امن کن تینا خیرخواہی کوشست آتے برجاتخنگ کن سنبرینگوک ءِ۔ وزیر خارجہ پارے کہ بین الاوغان مذاکرات اٹی داتم اسکان مروک آ پیش رفت ستاکڑزک۔ نن دوحہ ٹی بناکروک آ، بین الاوغان مذاکرات نا ارٹ میکو ریسہ نا بنانا ستاءِ کینہ۔ وزیر خارجہ پارے کہ نن بین الاوغان مذاکرات اٹ طے کروک فیصلہ غاتا ستاءِ کینہ۔ بین الاوغان مذاکرات نا حالیت اٹ اوغان سرکڑدہ غاتون امن نا اسہ پین موقع اس ساڑی ءِ ہراڑآن پبی فائدہ ہرفنگے۔ بدبختی اٹ بھارت اوغانستان اٹی حالیت آتے خراب کننگ ءِ و نن دا بابت ناقابل تردید شاہدی دنیا نا مون آ تخانن۔ وزیر خارجہ پارے کہ نن اوغانستان نا مخلوق نا آسراتی کن پوسکن ءُ ویزہ پالیسی اس درستی راستی کرفینن۔ داکان بیدس پاکستان و اوغانستان نا نیام اٹ ہڑتوم آ کنڈآتا واپار نا مون آ دننگ کن عملی گام گیج کننگ اُن۔ وزیر خارجہ پارے کہ نن پاکستان اٹ رہینگوک اوغان پناہ گزین آتا زوت، شرف اٹ و پروقار وطن آ پدی ہِننگ نا خواہندار اُن۔ وزیر خارجہ پارے کہ اوغان امن عمل اٹ پاکستان نا کڑد انا مچ آ دنیا ٹی ستاءِ کننگ انگ ءِ۔ اسہ ملک اس ہم پاکستان آن زیات اوغانستان اٹ امن نا خواہندار اف۔ نن سمجھنہ کہ ڈیہہ ٹی امن و سوگوی اوغانستان اٹی دیرپاقیام امن تون گنڈوک ءِ۔ اوغان حزب وحدت اسلامی اوغانستان نا سروک محمد کریم خلیلی جم و جوش اٹ خیرمقدم آ وزیر خارجہ وزیر خارجہ مخدوم شاہ محمود قریشی نا منت واری ءِ ہرفسا ، اوغان امن عمل اٹی پاکستان نا خیر خواہی کڑد انا ستاءِ کرے۔ اوتدوک آ کیہی دہائی آن اوغان باہوٹ آتا مہمانداری آ ہم پاکستان نا سرکڑدہ و الس نا منت واری ءِ ہرفے۔
