اسلام آباد۔ 12 جنوری (اے پی پی) بنجائی کابینہ آڈیٹر جنرل آف پاکستان نا ادارہ ءِ پین واکدار، وتواجہ و شفاف جوڑ کننگ کن کانودی ترمیم کننگ وصوبہ سندھ اٹی ضمنی گچین کاری تا حلقہ غاتیٹی امن و ایمنی ءِ برجاتخنگ نا خاطر پاکستان رینجرز تعینات کننگ تون اوار 15 ٹکی ایجنڈا نا منظوری ءِ تسنے، کابینہ اسلام آباد اٹی زوال کروک آ ورنا اسامہ ستی نا لمہ و باوہ ءِ کانودی کارروائی و انصاف نا فراوانی نا باوری کرفے۔ کابینہ بے گواہ بندغ آتا بابت گڑتی نا درشانی ءِ کرے و دا بے گمشدگی تا چٹفنگ کن کانود جوڑ کننگ نا پارت کرے۔ سے شنبے نادے آ بنجائی وزیر حوالکاری و شینکاری سینیٹر شبلی فراز وزیراعظم عمران خان نا کماشی ٹی بنجائی کابینہ نا دیوان آن پد مروک آ فیصلہ غاتا بابت حوال ترسا پارے کہ تدوک آ اِراسال آن ہر سے شنبے آ کابینہ نا دیوان مرسا بننگ ءِ، اینو 15 ٹکی ایجنڈا غا سجفنگا۔ اوپارے کہ آڈیٹر جنرل آف پاکستان نا فنکشن آتا بابت اس اتنگ اُن ہرانا مسخت اونا واکداری تے زیات پیدوار کننگ شفافیت اتنگ و دنگ ءِ ودفنگ نا ءِ۔ اوپارے کہ مہالو اخس کہ وتواجہ باڈیز ئسر اوفتا آڈٹ پرائیویٹ سیکٹر آن کرفنگاکہ، ہم آہنگی اتنگ کن نیشنل بینک آف پاکستان، اوجی ڈی سی ایل پین پین اسکان آڈیٹر جنرل نا دنگ ءِ ودفنگانے۔ آڈٹ نا پیرااِراوڑانا مریک اوفتے ٹی وڑوڈول انا نقائص و سنسی خیزی نا عنصر اوار ءِ، دا ترمیم تیان آڈٹ نا وڑوڈول اٹی جدت، ڈیجیٹل ٹیکنالوجی نا کاریم اٹ ارتنگ و ماہرانہ کاررائی ممکن مننگ کیک۔ کابینہ ءِ تیل انا اسمگلنگ ءِ توننگ نا خاطر ہلوک آ گام گیج آتا بابت معلومدار کننگا۔ کابینہ ءِ پاننگاکہ غیرکانودی و اسمگل مروک تیل انا بہا کننگ آن حکومت ءِ 180 ارب روپئی نا نسخان سگوئی تمک۔ اسمگلنگ تور اکن داوخت اسکان مچ آ ملک اٹی 192 پٹرول پمپ آتے سیل کننگانے ہرا اسمگلڈ تیل انا بہاکننگ اٹ اوار ئسر۔ کانودی کارروائی نا دا عمل برجاسلک۔ سلاہکار ادارہ جاتی اصلاحات ڈاکٹر عشرت حسین کابینہ ءِ معلومدار کرے کہ بنجائی حکومت نا 100 آن زیات ادارہ بند یا ایلو ادارہ غاتون ضم کننگانو تانکہ حکومت آ مالی بھاریم ءِ کم کننگ مرے و کارکڑد ءِ گچین کننگ مرے۔ اومستی معلومدار کرے کہ کم و ود 71،000کم درجہ (اسکیل 1 آن 16) نا آسامی ہراکہ اسہ سال انا مدآن زیات وخت اسکان خورک مسنو، اوفتے چٹفنگک۔ کابینہ ءِ معلومدار کننگا کہ اے جی پی آر نا ادارہ ٹی ڈیجیٹیلائزیشن نا عمل ءِ لاگو کننگ انگ ءِ ہراڑآن کرپشن نا چٹفنگ اٹ کمک رسینگک۔ کابینہ لیگل ایڈ اینڈ جسٹس اتھارٹی ایکٹ 2020ء نا رداٹ ڈائریکٹر جنرل نا تعیناتی نا شڑت آتے منظور کرے، دا اتھارٹی حقدار و نزور تپہ ءِ انصاف دوئی کننگ کن مالی و کانودی کمک فراوان کیک۔ کابینہ ایف آئی اے ایکٹ 1974ء نا رداٹ ایف آئی اے کمرشل بینک سرکل لاہور ءِ پولیس اسٹیشن نا درجہ تننگ نا منظوری ءِ تس۔ دا منظوری آن پد ایف آئی اے نا دا پولیس اسٹیشن نا عملداری نا اختیار لاہور، قصور، شیخوپورہ، ننکانہ صاحب و اوکاڑہ اسکان ودک ہراٹی بینکاری ڈوہ انا برخلاف کانودی کارروائی ممکن مننگ کیک۔ کابینہ قومی طب کونسل اٹی باسک آتا گچین کاری و ایڈمنسٹریٹر تعینات کننگ نا منظوری ءِ تس۔ خصوصی کمکار جان جوڑی کابینہ ءِ معلومدار کرے کہ مچ آ ملک آن دُوارہ کاریم اٹ اتوک آ سرنج نا چٹفنگ کن کانود اس اتنگ انگ ءِ۔ کابینہ پٹرولیم ڈویژن نا کنڈآن پبلک سیکٹر کمپنی تا بورڈ آف ڈائریکٹرز آ Ex-Officioڈائریکٹرز نا پنداری تیٹی بدلی کننگ نا منظوری ءِ تس۔ کابینہ وارت ریلوائی ءِ نوشہرہ ٹی تعمیرات کننگ نا معاملہ کمیٹی نا حوالہ کرے ہراٹی وزیر کانود، وزیر تعلیم، وزیر دفاع و وزیر ریلوائی اوار مریرہ، کابینہ پاکستان کونسل سائنس و ٹیکنالوجی نابورڈ آف گورنرز اس ٹہیفنگ نا منظوری ءِ تس۔ کابینہ کمیٹی ادارہ جاتی اصلاحات نا مورخہ 17 دسمبر 2020ء و 23 دسمبر 2020ء آ اڈ ہلوک آ دیوان تیٹی ہلوک آ فیصلہ غاتے پک کرے۔ کابینہ کمیٹی نجکاری نا مورخہ 04 جنوری 2021ء آ اڈ ہلوک آ دیوان اٹی ہلوک آفیصلہ غاتے پک کرے۔ کابینہ اقتصادی رابطہ کمیٹی نا مورخہ 06 جنوری 2021ء آ اڈ ہلوک آ دیوان اٹی ہلوک آ فیصلہ غاتے پک کرے۔ کابینہ یوٹیلیٹی اسٹورز کارپوریشن نا بورڈ آف ڈائریکٹرز نا تنظیم نو کننگ نا منظوری ءِ تس۔ کابینہ تعلیم نا مون آ دننگ کن معارف فاؤنڈیشن ترکی و بنجائی وزارت تعلیم نا نیام اٹ مفاہمتی یات داشت دستخط کننگ نا موکل تس۔ کابینہ صوبہ سندھ اٹی ضمنی گچین کاری تا حلقہ غاتیٹی امن و ایمنی ءِ برجاتخنگ نا خاطر پاکستان رینجرز تعینات کننگ نا منظوری ءِ تس۔ کابینہ دیوان اٹی وزیر ڈٹ بندی اسد عمر اسامہ ستی نا کیس ءِ ہرفے، وزیراعظم سخت خفی نا درشانی ءِ کرے کہ امر اسہ ورناءُ ماراسے سم اٹ خلسا اونا خون ءِ کننگانے، جے آئی ٹی تینا رپورٹ ءِ پورو کرینے۔ وزیراعظم زور شاغسا پارے کہ اگہ دا جے آئی ٹی آن وارث آتا است جم مفس تو ہراوڑنا انکوائری خوارہ اودے پک کینہ، زموار آتے سخت سزا ایتنہ۔ اسہ سوج اسے نا ورندی ٹی بنجائی وزیر حوالکاری سینیٹر شبلی فراز پارے کہ براڈ شی|‘ سکینڈل 2000 آن بناکرے۔ مسلم لیگ ن و پی پی ءِ این آر او تننگ آن پد دا انکوائری سردخانہ غا ہنا، 200پن تا فہرست ءِ تننگاسس ہرافک زر پیشن نا ملک آ گدریفیر داڑکن بین الوزارتی کمیٹی اس جوڑ کننگانے ہرا مچ آ کیس و چیدہ چیدہ ٹک آتا جاچ ءِ ہلیک۔
