اسلام آباد۔ 12 جنوری (اے پی پی) وزیر داخلہ شیخ رشید احمد تون پاکستان اٹی جاپان نا سفیر کینونوری متسودا سے شنبے نادے آ داڑے اوڑدہی کرے ہراٹی پاکستان و جاپان نا نیام اٹ تعلقداری تا مون آ دننگ و تین پہ تینی است خواہی نا ایلو باندات آ گپ وتران کننگا۔ وزارت داخلہ نا کنڈآن جاری بیان نا رداٹ وزیر داخلہ شیخ رشید احمد پاکستان نا اقتصادی و راجی شونداری ٹی جاپان نا کڑد انا ستاءِ کرے۔ اوپارے کہ پاکستان و جاپان نا نیام اٹ دیرینہ تعلقداری ءِ، جاپان مشکل حالیت آتیٹی ہم مدام پاکستان نا کمک ءِ کرینے۔ اوپارے کہ کورونا نا دین انا برخلاف کمک آ جاپان نا حکومت نا منت وار اُن۔ جاپانی سفیر آئی سی ٹی نا سیکورٹی و پولیس چیک پوسٹ آتا بابت ساڑی آ گام گیج آتا ستاءِ کرے۔ جاپانی سفیر پارے کہ بے گرج چیک پوسٹ آتے چٹفنگ آن الس ءِ ہن و بر اٹ آسراتی ودی مسنے۔ وزیر داخلہ پارے کہ پاکستان و جاپان نا نیام اٹ کانود نافذ کروک آ ادارہ غاتا نیام اٹ کمکاری ءِ ودفنگ نا گرج ءِ۔ پولیس ناکسبی تربیت نا بابت جاپان نا حکومت آن کمک ہلینہ۔ وزارت داخلہ نا چندی ڈٹ آتیٹی جاپانی حکومت نامالی و تکنیکی کمکاری آ منتوار ءِ۔ اوپارے کہ ننے تین پہ تینی شریداری ءِ ودفنگ و اسہ ایلو نا آزموندہ غاتیان ہیل کننگ نا گرج ءِ۔
