اسلام آباد۔ 12 جنوری (اے پی پی) بھارتی سینئر سفارتکار ءِ دفترخارجہ غا بٹنگسا 11 جنوری آ کوزہ گیر بھارتی فوج انا کنڈآن لائن آف کنٹرول (ایل او سی) نا نیزہ پیر سیکٹر اٹی جنگ بندی نا خارتس خلاف ورزی تیا ترند برانز ریکارڈ کننگا۔ بھارتی فوج انا خارتس سم کاری ٹی 10 سال انا بے گناہ چنا محمد ظہیر بھاز ٹھپی مس۔ سے شنبے نادے آ ترجمان دفترخارجہ نا رداٹ سینئر بھارتی سفارتکار ءِ دفترخارجہ غا بٹنگسا برانزی مراسلہ ءِ اونا دوٹی تس و پارے کہ کوزہ گیر بھارتی فوج ایل او سی و ورکنگ باؤنڈری نا پدریسہ خلاف ورزی کرسا آرٹلری، بھلو و خودکار سلہہ غاتا کمک اٹ لس شاری آبادی تے شست کننگ ءِ۔ بھارتی سفارتکار ءِ پاننگاکہ شاری آبادی تے دانستہ شست کننگ است ہسونی نا سوب، انسانی عظمت ووقار، جہانی انسانی حق و جہانی انسانی کانود آن اسُل چپ ءِ۔ بھارت نا کنڈآن جنگ بندی نا دا خلاف ورزی تیان علاقائی امن و سلامتی ءِ سنگین خطرہ مون تروک ءِ ہرانا نتیجہ اسٹریٹجک غلطی نا دروشم اٹ پیش تمنگ کیک۔ بھارت اینخو سال اٹی 48 وار خارتس جنگ بندی نا خلاف ورزی کرینے۔ ہراٹی 3 بیگناہ شاری بھاز ٹھپی مسر۔ بھارتی سفارتکار ءِ معلومدار کننگاکہ ایل اوسی آ بے چیٹی ٹی ودکی آن بھارت مقبوضہ کشمیر اٹی انسانی حق انا بھلا خلاف ورزی و بیدادی آن چکار ءِ اسہ کنڈ کننگ کپک۔ بھارت آ زور شاغنگاکہ او اِرا ہزار مسٹ نا جنگ بندی معاہدہ نا پاسداری ءِ کے۔ جنگ بندی نا خلاف ورزی نا دا واقعہ غاتا جاست وپاست ءِ کرفے، بھارتی فوج ءِ جنگ بندی نا شرف نا پرمان ایتے۔ ایل او سی و ورکنگ باؤنڈری آ اونا روح انا رداٹ امن ءِ برقرار تخے و اقوام متحدہ نا سلامتی کونسل نا قرارداد آتا رداٹ بھارت اقوام متحدہ نا فوجی مبصرین (یواین ایم او جی آئی پی) ءِ تینا کڑد ءِ ادا کننگ نا موکل ایتے۔
