اسلام آباد۔ 12 جنوری (اے پی پی) نیشنل کمانڈ اینڈ آپریشن سینٹر نا سروک بنجائی وزیر ڈٹ بندی شونداری و اصلاحات و خصوصی گام گیج اسد عمر پارینے کہ کورونا دین انا مسٹ میکو ریسہ غان ہر حال اٹ بچنگ نا کوشست کروئی مریک، ویکسین نا بننگ اٹ وخت لگک و ہمووخت اسکان ہربندغ نا زمواری ءِ کہ او خیال تخے۔ سے شنبے نادے آ میڈیا ءِ بریفنگ ترسا اوپارے کہ سمارٹ لاک ڈاؤن اٹی صنعت و تعمیرات نا بشخ ءِ ملنگا، پورو لاک ڈاؤن نا جاگہ غا اسمارٹ لاک ڈاؤن نا پالیسی ءِ اختیار کننگا۔ اوپارے کہ وزیراعظم کورونا دین انا سوب آن لاک ڈاؤن آن زہمی بے روزگار بندغ آتیا ہم چکار کرے۔ کورونا نا دین شون ہلوک ملک آتے ہم زہمی کرے، دین اٹی پاکستان نا پالیسی تا جہانی کہول آ است بڈی مس، گڑاس ملک آتیٹی سخت لاک ڈاؤن آن زرگزرانی مشکل آک ودار۔ اوپارے کہ کورونا دین اٹی پاکستانی پالیسی تے جہانی کہول آ اسٹ بڈی رسینگا۔ اقوام متحدہ، بل گیٹس و ایلو جہانی ادارہ غاک پاکستان نا سفت ءِ کریر۔ وخت آ فیصلہ کننگتوکہ تو نسخان نا اندیشہ ئس۔ دین اتون زند ءِ تیر کننگ عادت مسنے۔ اسد عمر پارے کہ کورونا نا دین اٹی ہر بندغ مشکل اٹ گزارہ کرے۔ پاکستان اٹی پنچ ءُ نیم کروڑ مخلوق معاوضہ نا عوض اٹ کاریم کیرہ۔ دین آن 2 کروڑ بندغ آتا روزگار زہمی مس، 10 درسد اُرا گڑاس وخت اسٹ آن زیات دے لنگڑ مسر، 30 درسد اُرا خور انا مفننگ آ بے رکھ انا گواچی مسر۔ زرگزرانی بدحالی نا سوب 54 درسد بندغ کنوئی آ گڑاتا ہلنگ ءِ کم کریر، 50 درسد اڑزآن ہلکر یا کنوئی آ گڑاتیٹی کمتی ایسر۔ 47 درسد بندغ پاریر اوفتے تینا مچ کروک آ پیسہ غاتے کاریم اٹ اتوئی تما، 30 درسد بندغ سنگت و پین پین آن وام تے اٹ گزاراکریر۔ اوپارے کہ دین انا ارٹ میکو ریسہ ٹی گڑاس ملک آتیٹی بھاز زیات مرک مننگ ءِ، برطانیہ، امریکہ ٹی کورونا غان اخس مرک 2021اٹی مننگ ءِ ہموخس 2020 اٹی متنے، پاکستان پورو نا جاگہ غا اسمارٹ لاک ڈاؤن نا پالیسی ءِ اختیار کرے۔ دسمبر نا اولیکو ہفتہ غان پد دین انا تالانی کم مس۔ اسد عمر مستی پارے کہ حکومت کورونا ویکسین دوئی کننگ کن ترندی اٹ فیصلہ کننگ ءِ، چینی کمپنی تون ہیت وگپ برجاءِ، زوت جوان ءُ خبر اس ایتنہ، گڑاس ملک آتیٹی کورونا نا مسٹ میکو ریسہ ہم خنانن، شاری تیان خواستءِ کہ دین اٹی خیال تخر۔
