ہری پور۔ 12 جنوری (اے پی پی) بنجائی وزیر توانائی، پٹرولیم و قدرتی وسیلہ عمرایوب خان پارینے کہ گدو بیراج اٹی ہفتہ و یک شنبے نا نیامی نن 11 بجہ ءُ 50 منٹ آ فالٹ بس ہراڑآن مچ آ ملک اٹی بلیک آؤٹ مس، الحمداللہ نن پنچ آن شش گھنٹہ ٹی فالٹ ءِ نئے بیرہ ٹریس کرین بلکن مُر کرسا بجلی ءِ بحال کرین و تینٹ نیشنل پاور کنٹرول سینٹر اٹ بحالی نا بحالی اسکان ساڑی ئسن۔ او تدوک آ دے اِرا کروڑ روپئی نا بھلو خڑچ اسے آن گھیڑیاں آن پنڈخان خیل سڑک نا تفنگ نا بنائی دود انا وخت آ اڈ ہلوک آ دیوان آن تران کریکہ۔ اوبنائی دود انا وخت آ جم و جوش اٹ بخیر آ ہندی مخلوق نا منت واری ءِ ہرفے۔ بنجائی وزیر عمرایوب خان داوخت آ ہندا ویلیج کونسل کن سوئی گیس ڈٹ انا زوت پوروی نا باوری ہم کرفے ہراڑکن او 6 کروڑ روپئی نا بھلو فنڈنگ اس منظور کرینے وخت اس کہ سوئی گیس انا مین لائنک پورو مسنو۔ بنجائی وزیر عمرایوب خان ضلع ہری پور نا چندی علاقہ غاتیٹی بجلی و سوئی گیس انا میگا ڈٹ آتا بابت گپ وتران کرسا بیروزگاری نا چٹفنگ کن ٹی آئی پی ءِ این آر ٹی سی نا حوالہ کرسا زوت فعال کننگ نا بابت ہیت ہم کرے۔ اومستی پارے کہ تربیلا لارنس پور سڑک نا اول سرآن تفنگ کن اسہ ارب 80 کروڑ وخت اس کہ کھلابٹ، کانگڑہ کالونی و غازی نا چندی اندرونی سڑک آتیکن 80 کروڑ روپئی نا فنڈنگ کرے ہرافتا ٹینڈر ہم مسنے و اوفتیا زوت کاریم نا بنامریک۔ بنجائی وزیر عمرایوب خان پارے کہ اللہ نا شکر ءِ کہ ننے الس تون کروک آ قول آتا پوروی نصیب مننگ ءِ، انشاء اللہ ساڑی آ دور اٹی نئے بیرہ السی محرومی تا چٹفنگءِ پک کننگ اُن بلکن دیرپا گچینی کن غٹ تر وسیلہ غاتے کاریم اٹ اتنگ اُن۔ ہندی سیاسی و راجی شخصیت ادریس خان داوخت آ سڑک نا تفنگ کن بھلو فنڈنگ اس کننگ تون اوار بجلی اسکیم و گیس انا زوت فراوانی نا باوری کرفنگ آ السی قائد عمرایوب خان نا منت واری ءِ ہرفے و اونا عملی خذمت آتیا اودے زبردست لوز آتیٹی خراج تحسین پیش کرے۔
