اسلام آباد۔ 11 جنوری(اے پی پی) وزیراعظم عمران خان تون پاکستان ٹینرز ایسوسی ایشن نا ڈل اوڑدہی کرے۔ دوشنبے نادے آ وزیراعظم میڈیا آفس آن جاری بیان نا رداٹ اوڑدہی ٹی بنجائی وزیر حماد اظہر، سلاہکار عبدالرزاق داؤد، خصوصی کمکار وقار مسعود و چیئرمین پاکستان ٹینرز ایسوسی ایشن انجم ظفر ئسک ساڑی ئسر۔ اوڑدہی ٹی وزیراعظم ءِ پاکستانی لیدر نا مچ آ دنیا ٹی ودوک آ خواست انا بارواٹی معلومدار کننگا۔ پاکستانی لیدر تینا بڑزکو آب و کم خڑچ انا سوب داوخت آ مچ آ دنیا ٹی پنی ءِ۔ مستی پاننگاکہ پاکستانی لیدر آ 300 درسد اسکان ویلیو ایڈیشن آن پد اودے دنیا نا پنی آ برانڈز ءِ برآمد کرسا ارب آ ڈالر زرمبادلہ کٹیا کننگ نا لائخی ساڑی ءِ۔ پاکستان اٹی ایٹ، میڷ، خراس و ڈگی نا سِل بڑزکو آب و وافر کچ اٹ تیار کننگک ولے کورونا و ایلو سوب آتا بناء آ دا صنعت تینا ہدف آتے پورو کننگ اٹ مشکل آتا گواچی ءِ۔ وزیراعظم ڈل ءِ باوری کرفے کہ لیدر نا صںعتءِ تینا مچ آ لائخی آ چلیفنگ کن حکومت ہروڑنا کمک کن تیار ءِ۔ حکومت نا مثبت زرگزرانی و کاروبار دوست پالیسی تا سوب صںعت نا پہیہ مست آن ترند چلینگ انگ ءِ ہرانا بھلا نشانی گچین زرگزرانی ٹک آک ءُ۔ وزیراعظم پارے کہ داوڑنا صںعت آک ہرا ملک اٹی ویلیو ایڈڈ برآمد آتا ذریعہ ءُ اوفتے مون آدننگ کن حکومت اولیتی بنداوتیا گام گیج کننگ ءِ۔
