اسلام آباد۔ 11 جنوری (اے پی پی) وزیراعظم عمران خان پارینے کہ ‘راست ’ نظام نا بناءِ کننگ ڈیجیٹل پاکستان نا کنڈآ اہم ءُ گام اسے۔ راست پروگرام آن نیزگاری نا چٹفنگ اٹ ہم کمک رسینگک۔بدبختی اٹ ننا ملک اٹی غٹ آن کم خراج یکجامریک۔ ریکارڈ ترسیلات زر بننگ آن ڈالر نامقابلہ ٹی روپئی سوگومس۔ دوشنبے نادے آ پاکستان نا اولیکو دمدستی ڈیجیٹل ادائیگی نا نظام ‘‘راست’’ انا بناءِ کننگ نا دود آن تران کرسا وزیراعظم راست نظام نا بناءِ کننگ آ اسٹیٹ بینک ءِ مبارکبادی ترسا پارے کہ راست نظام نا بناءِ کننگ ڈیجیٹل پاکستان نا کنڈآ اہم ءُ گام اسے، داڑآن زرتس نا نظام ءِ رکھوک و گچین کننگ مریک۔ وزیراعظم پارے کہ بدبختی اٹ ننا ملک اٹی غٹ آن کم خراج یکجا مریک۔ 22 کروڑ نا آبادی آن بیرہ 20 لکھ بندغ خراج ایترہ و اوفتیان ہم 70 درسد خراج بیرہ مسہ ہزار بندغ ایترہ، کم ریونیو نا سوب نن ملکی شونداری و شونہالی آ زیات خڑچ کننگ کپنہ۔ وزیراعظم پارے کہ احساس پروگرام نا کمک اٹ نیزگاری نا مون ءِ توننگ نا کوشست کننگ اُن، نیزگاری نا غٹ آن زیات اثرزالبول آتیا تمک، ہنداخاطرآن ننا احساس پروگرام نا مسخت ہم زالبول آتے اقتصادی شونداری ٹی اوار کننگ ناءِ و اوفتیکن ذریعہ معاش ودی کننگ اُن۔ وزیراعظم پارے کہ اسٹیٹ بینک انا کوشست آتیان ترسیلات زر اٹی ریکارڈ ودکی مس وخت اس کہ ریکارڈ ترسیلات زر بننگ آن ڈالر نا مقابلہ ٹی روپئی سوگو مس۔ وزیراعظم پارے کہ کرنٹ اکاؤنٹ سرپلس مننگ آن روپئی نا قدر آ مثبت اثرمرتب مسنے۔ اوپارے کہ کرنٹ اکاؤنٹ نسخان اٹی مرے تو روپئی آ زور ودک و تیل و ایلوزند انا گرج آک کبین مریرہ۔ وزیراعظم پاکستانی زالبول آتیکن گام گیج آ ملکہ میکسیمیہ نا منت واری ءِ ہرفے۔ اوپارے کہ پولیو تور پروگرام اٹ کمکاری آ بل اینڈ ملنڈاگیٹس فاؤنڈیشن نا منت وار اُن۔
