کوئٹہ۔ 11 جنوری (اے پی پی) وزیراعلیٰ بلوچستان جام کمال خان نا کماشی ٹی داڑے اڈہلوک آ اسہ بڑزکو کہولی دیوان اس سالانہ شونداری پروگرام 2020-21نا سرجم جاچ ءِ ہلنگا۔ دیوان اٹی صوبائی وزیر مواصلات میر عارف جان محمد حسنی، پارلیمانی سیکرٹری اطلاعات گودی بشریٰ رند، چیف سیکرٹری بلوچستان کیپٹن ریٹائرڈ فضیل اصغر، ایڈیشنل چیف سیکرٹری ڈٹ بندی و شونداری عبدالصبور کاکڑ، سیکرٹری ایس اینڈ جی اے ڈی محمد بلال جمالی، سیکرٹری خزانہ پسند خان بلیدی سیکرٹری روڈز سلیم اعوان، سیکرٹری بلڈنگ غلام علی بلوچ، سیکرٹری حوالکاری شاہ عرفان غرشین، کمشنر کوئٹہ ڈویژن اسفند یار کاکڑ و ایلو کمامدارآک بشخ ہلکر۔ دیوان اٹی چیف سیکرٹری بلوچستان شونداری ڈٹ آتا بابت حوال ترسا پارے کہ برجا و پوسکن آ شونداری ڈٹ آتیکن کم و ود 55 ارب روپئی نا اتھارائزیشن تسونن۔ وخت اس کہ 1597 پوسکن آ اسکیم تیان 1505 اسکیم تا پی ڈی ڈبلیو پی و ڈی ایس سی منظوری ءِ ءِ تسونن۔ اوپارے کہ برجا و پوسکن آ شونداری ڈٹ آتیکن داتم اسکان محکمہ خزانہ 44 ارب روپئی آن زیات نا فنڈ جاری کرینے۔ دیون ءِ پاننگاکہ سول سیکرٹریٹ نا پوسکن آ بلاک نا تفنگ کن اسپنی روڈ آ ڈغار سلاہ کننگانے وخت اس کہ سول سیکرٹریٹ اٹی سرکاری محکمہ و ڈائریکٹریس کن پوسکن آ سمارٹ بلڈنگ نا تفنگ نا پی سی ون نا محکمہ پی پی اینڈ ایچ آن بننگ داسکان سلوک ءِ۔ دیوان ءِ ایڈیشنل چیف سیکرٹری ڈٹ بندی و شونداری عبدالصبور کاکڑ صوبائی پی ایس ڈی پی اسٹریٹجی 2021-22نا بابت حوال ترسا معلومدار کرے کہ بروک آ مالی سال انا پی ایس ڈٛی پی نا تیاری کن باقاعدہ ٹائم لائن اس مرتب کننگانے ہرانا پابند مریک وخت اس کہ کانپسٹ کلیئرنس کمیٹیز کانسیپٹ پیپرز نا کلیئرنس 30 جنوری 2021 اسکان کیک ہنداوڑ یکم مارچ 2021 آن پی سی ون نا تیاری نا بناءِ کننگک محکمہ ڈٹ بندی و شونداری و انتظامی محکمہ غاتا کنڈآن مارچ و اپریل اسکان شونداری ڈٹ آتا پی ڈی ڈبلیو ڈی و ڈی ایس سی آن ٹیکنیکل منظوری ءِ ہلنگک۔ اوپارے کہ پی ایس ڈی پی نا اولیکو ڈرافٹ 15 مئی 2021 اسکان تیار کننگک۔ وخت اس کہ حتمی ڈرافٹ 30 مئی اسکان مرتب مریک۔ دیوان ءِ سیکرٹری روڈز سالانہ شونداری پروگرام 2020-21اٹی اوار بنجائی و صوبائی اسٹریٹجک روڈ سیکٹر پروجیکٹ آتا بابت سرجم حوال ترسا پوسکن آ سڑک آتا ڈٹ آتا بابت معلومدار کرے۔ وزیراعلیٰ گپ وتران کرسا پارے کہ بلوچستان قدرتی وسیلہ غاتیان شُپ ءُصوبہ اسے داڑے گیس، خیسن، ماربل تون اوار ایلو معدنیات آتا بھلو کوڑی اس ساڑی ءِ۔ معدنیات، توانائی سیل وسوات و کوسٹل ایریہ تیٹی زرکاری ءِ مون آ درسا صوبہ نا ریونیو ٹی ریکارڈ ودکی کننگ مریک۔ اوپارے کہ ہرضلع ٹی سڑک آتا جال اس تالان کننگ انگ ءِ کوئٹہ پیکج نا رداٹ ریکارڈ شونداری ڈٹ آتیا کاریم مننگ ءِ۔ وزیراعلیٰ پارے کہ حکومت چوری و عمررسیدہ بندغ آتے احساس پروگرام نا رداٹ ریلیف فراوان کیک۔ ہنداوڑ مرمرانگا علاقہ غاتا مخلوق ءِ درمان نا آسراتی تا فراوانی کن ٹیلی میڈیسن سینٹر آتے ہم ودفنگک۔ اوپارے کہ ساڑی حکومت غٹ ضلع غاتیٹی ہر سیکٹر اٹ شونداری پروگرام تا بناءِ کرینے ہرافتا پوروی آن نئے بیرہ لس بندغ ءِ فائدہ رسینگک بلکن علاقہ ٹی شونداری و شونہالی بریک۔
