لاہور۔ 11 جنوری (اے پی پی) وزیراعظم نا خصوصی کمکار احتساب شہزاد اکبر پارینے کہ شریف خاہوت لندن آن بروک آ خبر تیا وخت آن مست ہنینی بشخار، اسہ وار ولدا پک مس کہ دروغ تڑ آتا داستان اول سرآن دروغ جوڑ مس۔ نواز شریف قوم اتون پدریسہ دروغ تڑے، مستین اٹ گزارہ مسکہ داسہ دروغ ہلنگک، پانامالیکس آن پدآن دروغ تا ہلنگ نا چرجوئی بناکرے، پانامہ آن پد اوفک میڈیا غا قوم آن تران ہم کریر و عدالت آ ہم ہنار، غٹ جاگہ غاتیا کروک آ ہیت آک متضاد ئسر ہراتم معاملہ سپریم کورٹ اٹ زیر بحث بس تو دا گوندنگا کہ نواز شریف دروغ تڑسا تینا میرات آتے ڈکا و منی لانڈرنگ کرے، ہراوڑ راستکی تے مدام بدل کننگا کہ نواز شریف ءِ کرپشن آ آخا اقامہ غا کشنگا۔ داخیال آتا درشانی ءِ او ایوان وزیراعلیٰ ٹی میڈیا تون گپ وتران کرسا کرے۔ خصوصی کمکار پارے کہ شریف خاہوت نا کنڈآن 2012ٹی صحافی کاوے مساوی ءِ رشوت تننگ نا کوشست کننگا، لندن اٹی گڑاس رپورٹرز ءُ ہرافک آجو کاریم کیرہ اوفتا ہم دا بابت موقف ءِ ہلنگے۔ اوپارے کہ ہمووخت آ نیب 2000اٹی براڈ شیٹ ایسٹ ٹریسنگ کمپنی ءِ اسہ معاہدہ اسے نا رداٹ ہائر کرے ہراڑتون پاکستان حکومت معاہدہ دا پارسا چٹفیسس کہ کمپنی ننے کمک فراوان کپننگ ءِ اوکان پد براڈ شیٹ کمپنی آرٹریبیوشن آ ہنا ہراڑے کمپنی موقف اختیار کرے کہ او وخت انا حکومت ہرا ریکوریز کرینے ننے اوفتا 20 درسد معاہدہ نا رداٹ ادا کننگے، مصالحتی عدالت اٹ دا کیس 2016 اسکان چلینگسا کرے، جون 2020اٹی چارجنگ آرڈرخلنگا، براڈشیٹ ءِ پے منٹ مس تو اوکان پد چارجنگ آرڈر تننگا، آرٹریبیوشن اٹ ہراوڑ کیسءِ ہینڈل کننگا اوڑآ ہم کافی سوج ءُ، ہرکس کہ دانا زموار ءِ اوفتا برخلاف کارروائی مریک۔ ہراہیت آ شریف خاہوت والاک گمر کریرہ کہ کاوے مساوی اوفتا حق اٹی ہیت اس کرے اوہم ہیت غلط پیش تما، دابیرہ اقامہ نا ہیت اف۔
