اسلام آباد۔ 11 جنوری (اے پی پی) وزیر خارجہ مخدوم شاہ محمود قریشی پارینے کہ پاکستان ہر سفارتی پڑ آ بھارت نا مقابلہ ءِ کننگ ءِ، نن بھارت نا عزم ءِ پاش کرسا کینہ۔ بھارت پاکستان اٹی دہشت گردی نا پشت پناہی ءِ کننگ ءِ۔ دوشنبے نادے آ جہانی، اہم علاقائی امورو ملکی سیاسی حالیت آتا بابت اہم بیان اٹی وزیر خارجہ پارے کہ دنیا خننگ ءِ کہ بھارت دا ڈیہہ نا امن ءِ شیف بڑز کننگ نا پدریسہ کوشست آتیٹی لگوک ءِ۔ بھارت پاکستان اٹی دہشت گرد آتا پشت پناہی ءِ کننگ ءِ او اوغان امن عمل اٹ اسہ سپائیلر نا کڑد ءِ ادا کننگ ءِ۔ او خواپک کہ اوغانستان اٹی امن و سوگوی مرے۔ وزیر خارجہ پارے کہ پاکستان ہر سفارتی پڑ آ بھارت نا مقابلہءِ کننگ ءِ، بھارت غوغا کریکہ کہ اودے سلامتی کونسل نا بے آخبتی باسک مننگ نا ناطہ بھلو سرسہبی اس رسینگانے ودے مسہ کمیٹی تا صدارت نا موقع ملک۔ اوپارے کہ پاکستان ہم سلامتی کونسل نا غیر مستقل باسک رہینگانے و دا بابت پاکستان ءِ ہم اہم ءُ زمواری ملا۔ سلامتی کونسل اٹی سی انا خڑک کمیٹی و ذیلی کمیٹی مریک و غیر مستقل باسک مننگ نا ناطہ بھارت ءِ زمواری ملنگ ایہن ءُ ہیت اس اف ولے داہروئی ءِ کہ بھارت نا است خواہی انت ئس؟ بھارت نا است خواہی ئس کہ اودے 1267 نا قدغن خلوک آ اہم کمیٹی نا باسک جوڑ کننگے ولے اودے بے سہبی مس۔ اوپارے کہ بھارت نا است خواہی ئس کہ نیو کلیائی سلہہ غاتا توننگ نا کمیٹی نا صدارت اودے رسینگے ہرادے اودے رسینگتو، بھارت خواہسکہ کہ اوغانستان نا بابت کمیٹی ٹی اوار مرے انتئے کہ اودے اوغانستان نا باندات آتیان جتا تخنگا ہرااونا است خواہی پورو مننگ کتو۔ شاہ محمود قریشی پارے کہ نن بھارت نا کنڈآن دہشت گردی نا پشت پناہی نا قابل تردید شاہدی پی 5 اتون اوار غٹ انا مون آ تخانن۔ دنیا، بنک غٹ انا ولے راستکی تے چاہک و پہہ مریک۔ نن بھارت نا عزم ءِ پاش کرسا کینہ ننا اقوام متحدہ نا کہول آ،سلامتی کونسل نا کہول آ تینا سنگت آتون رابطہ ءِ نن تینا فائدہ غاتا رکھ و دفاع نا پورو لائخی تخنہ۔ وزیر خارجہ پارے کہ امریکہ ٹی پوسکن آ صدر بائیڈن 20 جنوری آ باقاعدہ تینا زمواری تے سنبھالک او بطور سینیٹر، فارن ریلیشنز کمیٹی نا سروک رہینگانے او دا ڈیہہ آن بلد ءِ او پاکستان آہم بسنے، او داجاگہ نا بھاز انگا شخصیت آتون شناسائی تخک اودے داجاگہ نا حالیت و واقعہ غاتا پورو سماءِ نن ہم اونا سوچ و قدر ءِ پہہ مرینہ ہندن کہ امریکہ ٹی پوسکن آ ایڈمنسٹریشن منصب ءِ سنبھالک نن اوفتے تون انگیج مرینہ، دا بابت ای زوت آن زوت پوسکن آ سیکرٹری آف اسٹیٹ انتھونی بلنکن ءِ چھٹی اس نوشتہ کیوہ۔ پی ڈی ایم جتاخیال مخلوق نا منفی سیوت ءِ ہرانا مسخت ساڑی حکومت ءِ ذق تننگ نا ءِ و ادارہ غاتیا زور شاغسا تینا کرپشن نا کیس آتیان خلاصی دوئی کننگ نا ءِ ہنداخاطرآن دا بھاز زوت منتشر مریک۔ اوپارے کہ پی ڈی ایم نا صدر مولانا فضل الرحمان صاحب نا اِرابھلو پڑو ئسر اسٹ اسمبلی تیان استیفہ تننگ و ارٹ میکو لانگ مارچ، ہراتسکان استیفہ غاتا معاملہ ءِ اوڑآ تو پیپلزپارٹی اول و داسہ نون لیگ ہم پدی مسنے وخت اس کہ لانگ مارچ آ ہم اوفتا امنا اف ہراتم 31 جنوری نا ڈیڈلائن چٹک تو دا اوار تولرہ و ولدا فیصلہ کیرہ۔ داڑآن ساف پاش مریک کہ اوفتا صف آتیٹی سیوت اف۔
