اسلام آباد۔ 11 جنوری (اے پی پی) بنجائی وزیر ڈٹ بندی، شونداری و خصوصی گام گیج اسد عمر پارینے کہ حکومت نا وخت آ فیصلہ غاتا سوب آن ارٹ میکو ریسہ ٹی کورونا نا کیس ومرک آتا کچ اٹی کمتی بننگ بناکرینے۔ دوشنبے نادے آ تینا ٹویٹ اٹی اسدعمر اسہ وار ولدا قوم آن کورونا دین انا تالانی ءِ توننگ کن رکھی گام گیج آتیا عمل کننگ نا خواست کرساپارینے کہ جان جوڑی نا نتیجہ غاک ننا فیصلہ و جند انا گچین کاری تون پبی وڑاٹ منسلک ءُ۔ بنجائی وزیر پارے کہ ہراتم ارٹ میکو ریسہ ٹی ترندی بس تو نن نومبر نا آخیریکو ہفتہ ٹی تینا جاچ انا رداٹ زیات خطرہ والا علاقہ غاتے بند کریسن۔ اوپارے کہ دسمبر نا اولیکو ہفتہ ٹی ہسپتال اٹی داخل مروک آ ناجوڑ آتا کچ کاٹم آن گدرینگاسس، ارٹ میکو ہفتہ ٹی آکسیجن/وینٹی لیٹر نا ناجوڑ آتا کچ انتہاغائس، مسٹ میکو ہفتہ ٹی مرک آتیٹی ودکی مس و ولدا کمتی بس۔ فیصلہ و نتیجہ غاک بھلو حداسسکان تین پہ تینی تخرہ۔ اوپارے کہ حساب وکتاب داپیدوار کرے کہ حساب وکتاب پیدوار کیک کہ کوویڈ۔ 19 نا نتیجہ غاک جندی گچین کاری و فیصلہ غاتون ہراوڑاٹ گنڈوک ءُ۔ ہنداخاطرآن دا المی ءِ کہ نن غٹ زمواری ہلین و رکھی گام گیج اختیار کین، اگہ نن سہی کاریم کینہ تو نن زند و زرگزران نا رکھ ءِ کرسا کینہ۔ اونا پاننگ ئس کہ دادے تیٹی امریکہ وبرطانیہ کون آملک آتیٹی تباہی تالان مننگ ءِ ہراڑے اولیکو ریسہ نا مقابلہ ٹی کیہی زیات کیس و کوویڈ۔ 19 آن مرک مننگ ءِ، دا خطرہ داہیت انا پیدواری ءِ کیک کہ اگہ نن سہی کاریم تے برجاتخپنہ تو ننے ہراخطرہ تون مون تروئی تمنگ کیک، اومستی پارے کہ ریاست و شاریک ہڑتوم آک تینا کڑد ءِ ادا کننگ ءُ۔ وزیر ڈٹ بندی دا انتباہ ملک اٹی کورونا نا کیس آتیٹی 5 لکھ آن گدرینگ انگ نا اسہ دے پد تسنے، داتم اسکان پاکستان اٹی 5 لکھ 4 ہزار 293 بندغ کورونا کیس آتا گواچی مسنو و 10 ہزار 676مرک مسنے وخت اس کہ داناجوڑی آن 4 لکھ 58 ہزار 371 بندغ دراخ جوڑ مسنو۔
