اسلام آباد۔ 11 جنوری (اے پی پی) اینخو مالی سال اٹی تمباکو نا برآمد آتیٹی 9.7 درسد ودکی مسنے۔ ادارہ شماریات پاکستان، پی بی ایس نا حساب وکتاب نا رداٹ برجامالی سال انا اولیکو پنچ تُواٹی جولائی آن نومبر 2020ء ٹی برآمد آتا کچ 12.747ملین ڈالر اسکان ودا وخت اس کہ تدوک آ مالی سال اٹی جولائی آن نومبر 2019ء ٹی تمباکو نا برآمد آتیان 11.620 ملین ڈالر زرمبادلہ کٹیا کننگاسس۔ ہنداوڑ تدوک آ مالی سال انا مقابلہ ٹی اینخو مالی سال اٹی تمباکو نا قومی برآمد آتیٹی 1.127ملین ڈالر یعنی 9.7 درسد ودکی ریکارڈ کننگانے۔ پی بی ایس نا رداٹ نومبر 2019ء نا مقابلہ ٹی نومبر 2020ء ٹی تمباکو نا برآمد آک 9.71درسد ودکی آن 3.985ملین ڈالر نا مقابلہ ٹی 4.372ملین ڈالر اسکان سرمسر وخت اس کہ اکتوبر 2020ء نا مقابلہ ٹی نومبر 2020ء ٹی برآمد آتیٹی 48.40 درسد نا نمان ودکی مسنے۔ یات سلے کہ اکتوبر 2020ء ٹی تمباکو نا برآمد آک 2.946 ملین ڈالر ئسر وخت اس کہ نومبر 2020ء ٹی برآمد آتا کچ 4.372 ملین ڈالر اسکان ودا۔
