کوئٹہ۔ 11 جنوری (اے پی پی) گورنر بلوچستان امان اللہ خان یاسین زئی پارینے کہ راج اٹ میرٹ ءِ برقرار تخنگ و حق ءِ حقدار اسکان سرکننگ اٹ ادارہ غاتا اہم ءُ کڑد اسے۔ بدبختی اٹ ننا قومی ادارہ غاک مخلوق نا مثبت و تعمیری جوڑ کننگ اٹ پورو وڑاٹ سرسہبی آن ہمکنار مننگ کتوس۔ داہیت ءِ او دوشنبے نادے آ گورنر ہاؤس کوئٹہ ٹی بلوچستان پبلک سروس کمیشن نا چیئرمین سالک خان درانی نا کماشی ٹی بی پی ایس سی نا باسک آتیا تالان اسہ ڈل اسے تون گپ وتران کرسا کرے۔ داوخت آ گورنر بلوچستان پارے کہ داہیت ستاکڑزک کہ ملک انا کل آبادی نا بھلو بشخ اس ورناتیا تالان ءِ ولے اوفتے روزگار نا وارخواہی فراوان کننگ و اوفتا لائخی تے قومی فائدہ غاتیکن کاریم اٹ اتنگ ہم ریاست نا زمواری ءِ۔ دارداٹ بلوچستان پبلک سروس کمیشن کون آ ادارہ غاتا کڑد بھاز اہم ءِ۔ اوپارے کہ وخت بسنے کہ نن ملک و صوبہ نا سوگو شونداری ءِ سُچا بنداوی فراوان کننگ کن سوشل سائنس آن زیات نیچرل سائنس آ پبی چکار تخن۔ داہیت ستاکڑزک کہ مچ آ صوبہ نا خلقی آ علاقہ غاتا طالب علم آک کچ اٹنگا وسیلہ غاتیان پد ہم مقابلہ نا امتحان تیٹی نمان پوزیشن ہلنگ ءُ۔ گورنر یاسین زئی بلوچستان پبلک سروس کمیشن نا چیئرمین و اونا مچ آ ٹیم آ زور شاغا کہ او ادارہ غاتے پین گچین و شفاف کننگ کن پبی کڑد ادا کیر تانکہ حق ءِ حقدار اسکان سرکننگ نا کسر آوار مننگ کے۔ ایسر اٹ چیئرمین سالک خان درانی گورنر بلوچستان ءِ ادارہ نا سالانہ رپورٹ ءِ پیش کرے۔
