نن سندھ ءِ پوسکن جوڑ جاڑ کینہ، الس نا ٹھپ آتیا مالم تخنہ، سندھ انا خلق، گوٹھ و قصبہ غاتے پوسکن ءُ ولولہ ا س ایتنہ
سندھ انا کنڈ کنڈ اٹی تازہ تہوک چلینگرہ، بجلی، گیس ، دیر ، جان جوڑی نا آسراتی تیان بیدس داڑے موٹروے ہم جوڑ مریک
ٹھٹھہ ٹی 500 کٹ آتا ہسپتال اس قائم کننگ، ٹھٹھہ ، سجاول و ٹنڈومحمد خان اٹی جان جوڑی کارڈ آتا فراوانی نا پروگرام، بجلی، گیس ، دیر و روڈ آتا جوڑ جاڑ نا ڈٹ بناء کننگ نا پڑو
ٹھٹھہ۔ 09 مارچ (اے پی پی) وزیراعظم محمد نواز شریف پارینے کہ نن سندھ ءِ پوسکن جوڑ جاڑکینہ، الس نا ٹھپ آتیا مالم تخنہ۔ سندھ انا خلق، گوٹھ و قصبہ غاتے پوسکن ءُ ولولہ اس ایتنہ، سندھ انا کنڈ کنڈاٹی تازہ تہوک چیلنگرہ، بجلی، گیس ، دیر ، جان جوڑی نا آسراتی تیان بیدس داڑے موٹروے ہم جوڑ مریک، نن سندھ انا محرومی تے مر کننگ نا عزم کرینن ، سندھ انا خلق و دیہات آتے پنجاب نا شارتیانبار جوڑ کینہ، شاہ عبدالطیف بھٹائی و لعل شہباز قلندر نا دھرتی نا ملاسی ءِ چٹفنہ، الس تون اواری اٹ جوڑ جاڑ و شونداری نا کاریم ءِ کینہ۔ او ٹھٹھہ ٹی 500 کٹ آتا ہسپتال اس جوڑ کننگ آن بیدس ٹھٹھہ، سجاول و ٹنڈومحمد خان اٹی خلقت ءِ درمان نامفت آسراتی تا فراوانی کن علاقہ ٹی جان جوڑی کارڈ آتا فراوانی نا پروگرام ، بجلی، گیس ، دیر و روڈ آتا جوڑجاڑ نا ڈٹ آتا بناء کننگ نا پڑو ءِ کرے۔ او پنچ شنبے نا دے ٹھٹھہ ٹی لس جلسہ آن تران کریکہ۔ وزیراعظم پارے کہ ہراویل آتا داڑے ذکر کننگا او صوبہ نا دوٹی ءُ و صوبائی حکومت بایدے اوفتے ایسر کروسس ولے دا ایسر مننگ کتوس ہنداخاطران بنجائی حکومت دا غٹ ویل آتے ایسر کیک، اللہ کنے وزیراعظم جوڑ کرینے ہنداخاطران دا ویل آتے ایسر کرسا نشان ایتیوہم، نن سندھ انا پوسکن جوڑ جاڑ کینہ، الس نا ٹھپ آتیا مالم تخنہ، سندھ انا خلق، گوٹھ و قصبہ غاتے پوسکن ءُ ولولہ اس ایتنہ، سندھ انا کنڈ کنڈ اٹی تازہ تہوک چیلنگرہ، بجلی ، گیس ، دیر ، جان جوڑی نا آسراتی تیان بیدس داڑے موٹروے ہم جوڑ مریک، نن سندھ انا محرومی تے مر کننگ نا عزم کرینن، سندھ انا خلق و دیہات آتے پنجاب نا شارتیانبار جوڑ کینہ ، شاہ عبدالطیف بھٹائی و قلندرنا دھرتی نا ملاسی ءِ چٹفنہ۔ اوپارے کہ حقدار الس ءِ جان جوڑی نا مفت آسراتی تا فراوانی کن پنجاب، بلوچستان ، آزاد کشمیر ، فاٹاو گلگت بلتستان اٹی ہیلتھ کارڈ آتا اسکیم نا بناکننگانے وخت اس کہ سندھ و خیبر پختونخوا ناحکومت آک پاریسر کہ او داکاریم ءِ تینٹ کیرہ۔ وزیراعظم پارے کہ داڑے ہندن ءُ بندغ ہم ارے ہرافتا غٹ جمع پونجی خڑچ مننگ نا باوجود ہم درمان مفننگ ءِ ، ہنداخاطران نن مفت درمان نا آسراتی کن ہیلتھ کارڈ آتا پروگرام نا بناءِ کرین، ٹھٹھہ ، سجاول و ٹنڈومحمد خان اٹی ہم خلقت ءِ ہیلتھ کارڈ جاری کننگک و داجاگہ نا خلقت ءِ جان جوڑی کارڈ جاری کننگ کن ای تینٹ بریوہ، جان جوڑی کارڈ آتا حامل بندغ آتے سرکاری و پرائیویٹ ہڑتوم آ وڑنا ہسپتال آتیٹی درمان نا مفت آسراتی دوبریک ہراڑآن خالق و مخلوق ہڑتوم آک راضی مریرہ۔ داوخت آ وزیراعظم ٹھٹھہ ٹی 500 کٹ آتا ہسپتال اس جوڑ کننگ نا ہم پڑو ءِ کرے و پارے کہ دا اسہ بھلو ہسپتال اس مریک ہراڑآن خلقت ءِ جان جوڑی نا آسراتی دوبریک۔ وزیراعظم نواز شریف علاقہ نا چندی خلق آتیٹی بجلی نا فراوانی نا ہم پڑو ءِ کرے و پارے کہ ہراہراڑے بجلی نا گرج مریک ، تننگک۔ اوپارے کہ 2013ء ٹی بجلی نا حالیت آک بھاز خراب ئسر ولے داسہ حالیت آک بھاز جوان ءُ ، خلقت ءِ داآسراتی تیان فائدہ ہرفنگ کن بجلی نا بل ضرور ادا کروئی مرے۔ اوپارے کہ بجلی نا وزیر و سیکرٹری ءِ زوت داڑے گدریفنگک ہراداڑے تولسا دا ویل ءِ ایسر کیک۔ وزیراعظم پارے کہ ہموہراک پارہ او کرسا نشان ایترہ ، داڑے بننگ آن مست غٹ تیاری پورو کننگانو و ڈٹ آتیا کاریم و فنڈ انا بابت احکام جاری کننگانے، سجاول و ٹھٹھہ ءِ گیس انا فراوانی نا احکام ہم جاری کننگانے، داڈٹ آ 110 کروڑ روپئی خڑچ بریک۔ وزیراعظم پارے کہ دا نمے آ احسان اس اف بلکن نما حق و بطور وزیراعظم کنافرض ءِ۔ اوپارے کہ آبی کٹاؤ نا سوب آن داجاگہ نا نہادی کشاری ڈغار سمندر نا گواچی مننگ ءِ داہم صوبائی حکومت نا معاملہ ءِ ولے نن سمجھنہ کہ دادے دمدستی وڑاٹ بایدے ایسر مرے ہنداخاطران نن ٹھٹھہ ، سجاول و بدین اٹی حفاظتی بند جوڑ جاڑ کننگ نا فیصلہ کرینن، دااسہ عظیم ءُ ڈٹ اسے ہراڑآن داجاگہ نا سنہری ڈغارتے سمندری کٹاؤ آن رکھوک جوڑ کننگک و دانا فائدہ مچ آ علاقہ ءِ رسینگک ۔ داڈٹ انا فزیبلٹی سٹڈی تیار کننگ نا پارت کننگانے ہرانا روشنی ٹی کاریم نا بناء کننگک۔ وزیراعظم پارے کہ گھاروکیٹی بندر ڈٹ انا بابت این ایچ اے ءِ پارت کننگانے کہ دا چرجوئی ٹی بروک آ غٹ اڑاند آتے مر کرسا کاریم نا بناءِ کننگے، داڈٹ اکن 50کروڑ روپئی نا فنڈ جاری کننگ نا پارت کرینن۔ وزیراعظم پارے کہ علاقہ ٹی 50کلومیٹر مریس خلقی روڈ آتے کن ہم زر فراوان کننگ انگ ءِ۔ داکان بیدس ہڑتوم آضلع غاتیٹی گلی کوچہ غاتیٹی نکاسی، گلی تا پکائی و صاف دیر انا فراوانی کن 20,20 کروڑ روپئی نا فنڈ انا پڑو ءِ کیوہ۔ اوپارے کہ کراچی آن حیدرآباد 6رویہ موٹروے کم وود تیار مسنے۔ ہنداوڑ حیدرآباد آن سکھر، سکھرآن ملتان و ملتان آن مون آ روڈ جوڑ جاڑاٹی ءِ ہرانا پوروی آن غٹ ءِ فائدہ رسینگک، اوپارے کہ علاقہ ٹی جان جوڑی ، بجلی ، گیس و دیر انا آسراتی تا فراوانی آن پد یونیورسٹی ہم قائم کننگک۔ داوخت آ شیرازی برادران سید اعجاز شاہ شیرازی و سید شفقت شاہ شیرازی و ایلوک ہم تران کریر و علاقہ نا الس نا کنڈآن بجلی، گیس ، جان جوڑی ، دیر وروڈ آتا جوڑ جاڑ تون اوار چندی خواست آتے پیش کریر۔ اوفک وزیراعظم نا علاقہ ٹی بننگ آ خیرمقدم ءِ کرسا پاریر کہ داجاگہ نا خلقت نا نظروزیراعظم نواز شریف آٹی ءُ۔ اوفک پاریر کہ ٹھٹھہ و سجاول نا ضلع غاتے بھلو وخت اسے آن نظر انداز کننگانے ولے داسہ اوفتا ایسر مننگ نا وخت بسنے۔ اوفک پاریر کہ وزیراعظم ملکی جوڑ جاڑ و شونداری کن کوشست کننگ ءِ۔
