اسلام آباد۔ 24 نومبر (اے پی پی) پاکستان اقوام متحدہ نا سلامتی کونسل آن خواست کرینے کہ او بھارت ءِ اونا غیر کانودی کوزہ گیری ٹی جموں و کشمیر اٹی مسلمان تا اکثریت ءِ اقلیت اٹ بدل کننگ نا مجرمانہ نوآبادیاتی ڈٹ آ عملدرآمد کننگ آن تورے، اقوام متحدہ نا تینا منظور کروک قرارداد آتا رداٹ بھارت ءِ دا نوآبادیاتی ڈٹ آن توننگ 15 باسکی سلامتی کونسل نا براہ راست زمواری ءِ۔ وزیر خارجہ شاہ محمود قریشی سلامتی کونسل نا نومبر نا تُواکن صدر سینیٹ وینسینٹ و گرینا ڈاکی نا سفیر انگارہونڈا نا پن نوشتہ کروک آ چھٹی ٹی اونا چکار ءِ دا کنڈآ کرفینے کہ بھارت نا غیر کانودی کوزہ گیری ٹی جموں و کشمیر اٹی مسلمان تا اکثریت ءِ اقلیت اٹ بدل کننگ بھلو گڑتی نا ہیت اسے۔ ہراڑے کشمیری تا انسانی حق انا شدید خلاف ورزی تیان ڈیہہ نا امن و سیکورٹی ءِ مون تروک خطرہ غاتیٹی ودکی مننگ ءِ۔ دا ڈیہہ اقوام متحدہ ٹی پاکستان نا آخبتی نمائندہ منیر اکرم نا کمک اٹ دوشنبے نا شام نیویارک اٹی اقوام متحدہ نا ہیڈکوارٹراٹی کونسل نا صدر، سفیر اینگارہونڈاءِ تننگا۔ دادے ایجنڈا آئٹم‘‘بھارت پاکستان سوال’’نارداٹ سلامتی کونسل نا سرکاری دستاویز نا وڑاٹ باسک ملک آتے گدریفنگک۔ وزیر خارجہ پارے کہ 5 اگست 2019ء آ بھارت نا کنڈآن کشمیرءِ غیر کانودی وڑاٹ الحاق کننگ آن پد آن، بھارت فوجی کوزہ، کشمیری تا ڈغار تے ضبط کننگ، غیرکشمیری تے مقبوضہ جموں کشمیر آ اتنگ، و جھیڑہ ئی علاقہ ٹی اجنبی تا آبادی تا جوڑ کننگ نا ڈٹ بندی حکمت عملی آ عمل کننگ ءِ۔ چھٹی ٹی پاننگانے کہ پانزدہ تُو آن زیات وخت اسکان برجا فوجی گھیڑ و مواصلاتی ناکہ بندی، جعلی مقابلہ غاتیٹی بے گناہ شاری تا عدالت آن ایڑتر کسفنگ و کشمیری تیکن اجتماعی سزا آن بیدس، آر ایس ایس نواز بھارتی حکومت تینا کوزہ ٹی غیر کانودی مقبوضہ جموں و کشمیر اٹی آبادی نا تناسبءِ بدل کننگ نا غیر کانودی گام گیج آتے ترند کرینے۔ داٹی پاننگانے کہ بھارتی حکومت غیر کشمیری آبادکار آتے 20 لکھ آن زیات، ڈومیسائل جاری کرینے، و وڑوڈول ءِ آسان کرینے، وخت اس کہ سرکاری کارندہ غاتے 15 دے انا تہہ ٹی ڈومیسائل تننگ اٹ بے سہب مننگ آ جرمانہ عائد کننگک۔ ایلوگڑاتیان بیدس، بھارت کشمیری الس ءِ بنداوی رکھ فراوان کننگ کن کانود نا اسہ سیریز اسے کالعدم گوندسا اوٹی ترمیم کرے۔ ہراڑآن بھارتی شاری تے مقبوضہ علاقہ نا ہنکینی یا ہنکین آن بیدس والا غیر زرعی ڈغار ہلنگ نا موکل تننگا۔ چھٹی ٹی پاننگانے کہ بھارتی کوزہ گر فورس آتے گڑاس ڈغار تے اسٹریٹجک ایریا گوندنگ و اوفتے‘شونداری’ مسخت آتیکن تینا کاریم اٹ اتنگ نا موکل تننگانے، ہراڑآن اوکشمیر اٹی سروس کروک آ و ریٹائرڈ ہندوستانی فوجی عہدیدار آتے آباد کننگ کن پین چھاؤنی و فوجی کالونی تفک۔ ہندوستانی حکومت نا تینا ریکارڈ نا رداٹ، بھارتی فوج مہالو آن ‘ قومی سلامتی’ نا آڑ اٹی کشمیر اٹی 53353 ایکڑ جنگل والا، کشاری و واپاری نہادی ڈغارتیا کوزہ کرینو۔ نیز، چھٹی نا رداٹ ، آرایس ایس۔ بی جے پی حکومت نا غیر منقولہ جائیداد غیر منقولہ جائیداد و مالدار تیکن کسر ءِ آوار کننگانے ہرا پن آ، شونداری نا آڑ اٹ زیات آن زیات ڈغار دوئی کننگ خوارہ۔ چھٹی ٹی پاننگانے کہ جولائی 2020 آن، اسہ پوسکن ءُ، اڑزآن ہاؤسنگ، کچہ آبادی و بحالی و کاروباری پالیسی نارداٹ، پیشن نا بندغ آتے، خاص وڑاٹ ہندوستان اٹ، ہندی پاروک آتا بیلٹ، آن، کشمیری تا گل زمین ءِ غیر کانودی مقبوضہ جموں و کشمیراٹ آباد مننگ کن آسراتی نا پیش کش کننگ انگ ءِ۔ داغیر کانودی گام گیج آتیان غیر کانودی مقبوضہ جموں و کشمیر ءِ خطرہ مون تروک ءِ کہ او پیشن نا آبادکار آتا کنڈآن پورووڑاٹ نوآبادیاتی جوڑ مننگ تون ہندی کشمیری تا تینا سیاسی و دودوربیدہ ئی شناخت زہمی مریک و ہنداوڑ او تینا روا آبادیاتی اکثریت و تینا ہی ملک اٹ تینا جائیداد آتا ملکیت آن محروم مریرہ۔ اوپارے کہ بھارت وخت اس ہم کشمیری تا حق خودارادیت نا تینا میراتی حق ءِ دوئی کننگ نا روا جہد ءِ توننگ اٹ سرسہب مننگ کپک۔ اقوام متحدہ نا چارٹر نا دفعہ غاتارداٹ و جموں و کشمیر نا بابت اونا قرارداد آتا رداٹ، سلامتی کونسل نا براہ راست زمواری مریک کہ او بھارت ءِ جھیڑہ ئی علاقہ نا آبادیاتی پنجر ءِ بدل کننگ و مجرمانہ نوآبادیاتی ڈٹ آ عملدرآمد آن تورے انتئے کہ منظور کروک آ قرارداد آک اقوام متحدہ نا کنڈآن آجو و بے کنڈ ہلوک رائے شماری نا کمک اٹ کشمیری تے حق خودارادیت تننگ نا روا حق ءِ امنا کیرہ۔
