اسلام آباد۔ 08 نومبر (اے پی پی) صدر مملکت ڈاکٹر عارف علوی پارینے کہ پاکستان ءِ اسہ شونہال قوم اس جوڑ کننگ کن المی ءِ کہ نن اسلام نا بارواٹی ڈاکٹر علامہ اقبال نا پیروی ءِ کین، شاعر مشرق نا فلسفہ تینے آ باور کرسا نن تینا عزت و انسانی وقار اٹی ودکی کننگ کینہ۔ صدر مملکت عظیم فلسفی شاعر ءِ اونا ودی دے انا وخت آ زبردست خراج عقیدت پیش کرے۔ تینا کلہو اٹی صدر مملکت پارے کہ ڈاکٹر علامہ محمداقبال برصغیر نا مسلمان تا بھلا محسن ئس ہرا مسلمان تیکن جتا ءُ وطن اسے نا تغ ءِ خنا و اوکان پد اونا تغ حقیقت اٹ بدل مس، علامہ اقبال بھاز بھلو مفکر اس ئس ہرا تینا نوشست و شاعری نا کمک اٹ مسلمان تے سیوت نا رغاما، ہرانا بنداو آ اوفتے جتا ءُ وطن اسے نا دوئی کننگ اٹ بھاز کمک رسینگا، صدر مملکت ڈاکٹر عارف علوی پارے کہ علامہ اقبال مسلمان تیٹی انقلابی ساہ اس شاغا و مسلمان تا حق انا رکھ اکن عظیم خذمت سرتس، ڈاکٹر علامہ محمد اقبال برصغیر اٹی مسلم راج انا قیام کن اہم کڑد ادا کرے۔ اوپارے کہ شاعر مشرق نا فلسفہ خودی آ عمل ننے شونداری نا پوسکن آ بڑزی تسکان سرکننگ کیک۔ صدر مملکت پارے کہ ننا اہل وطن و خاص کر ورناچین ءِ مرے کہ او اونا پیروی ءِ کیر ہراڑآن پوسکن آ دور اٹی مسلم امہ ءِ مون تروک ویل آتا مون ءِ توننگ اٹ کمک رسینگک۔ صدر مملکت پارے کہ پاکستان ءِ اسہ شونہال قوم اس جوڑ کننگ کن المی ءِ کہ نن اسلام نا بارواٹی ڈاکٹر علامہ اقبال نا پیروی ءِ کین و اونا فلسفہ خودی آ باور کرسا نن تینا عزت و انسانی وقار اٹی ودکی کننگ کینہ۔ اوپارے کہ داسہ یکجا مننگ نا سخت گرج ءِ و نن تین پہ تینی اختلاف آتے اسہ کنڈ تخسا ملک انا راجی و زرگزرانی شونداری کن زیات عزم اٹ کاریم کین۔ صدر مملکت پارے کہ اینو نادے ننے امت مسلمہ نا سیوت، شونداری و ملک اٹی شونہالی نا رغامک۔ صدر مملکت تینا کلہو نا ایسری ءِ ڈاکٹر علامہ محمد اقبال نا دا شئیر آ کرے۔
