این آر او دیئگ ءُ من ءُ گر کنگ ارزانیں کشک اِت بلے اے تباہی اِت، وانگ ءُ زانگ ءُ پٹ ءُ پول ءِ سرءَ دلگوشی کنگ ءَ اَنت، کارڈیک سٹنٹ ءِ جوڑ بوہگ ءَ چہ علاج ءِ حرچ کم بنت، مزن وزیر عمران خان

اسلام آباد۔16اکتوبر (اے پی پی): مزن وزیر عمران خان ءَ گشتگ کہ این آر او دیئگ ءُ منءُ گر کنگ ارزانیں کشک اِت بلے اے تباہی اِت، حکومت نالج اکانومی ءِ گیش کنگ ءِ ھاترءَ کمک کنت، مزن تک ءِ وانگ ءُ زانگ ءُ پٹءُ پول ءِ سرءَ دلگوشی کنگ ءَ اِنت، ہندی تک ءَ کارڈیک سٹنٹ ءِ جوڑ کنگ ءَ چہ دل ءِنادراہ آنی علاج ءِ حرچ کم بنت، 70 ءِ زمانگ ءَ قومیانے ءِ پالیسی ءَ صنعتی عمل ءَ را آماچ کتگ، درملکی پاکستانی ملک ءِ میراث اَنت، ملک ءَ را راستیں نیمگے ءَ رہادگ کوتگ۔ اے ھیالانی درشانی آئی ءَ جمعہ ءِ روچءَ نسٹ ءَ این۔اوویٹوہیلتھ ٹیکنالوجی ءِ بُنگیج ءِ مراگش ءَ گوں تران کنان ءَ کتگ۔ مزن وزیر ءَ گشتگ کہ ہندی تک ءَ کارڈیک سٹنٹ ءِ جوڑ بوہگ یک حاسیں گامگیج اِت ایشی ءَ چہ نسٹ ءِ انتظامیہ ءَ را مراد بات پیش کناں۔ آئی ءَ گشتگ کہ وہدے کہ ما حکومت سمبال ایتگ گڈا برآمدات ءِ مقابلہ ءَ درآمدات باز گیش بوتگ اَنت۔ درآمدات ءِ مالیت 60 ءُ برآمدات 20 ارب ڈالر بوتگ اَنت۔ بیپاری نقصان معیشت ءِ سرءَ مزنیں بارے بوتگ۔ ڈالر گیش ملک ءَ چہ ڈن ءَ رؤگ ءَ بوتگ کہ ایشی ءَ چہ کلدار ءِ نیاد کپتگ بوتگ۔ ڈالر ءِ کمی ءَ را پیلو کنگ ءِ ھاترءَ آئی ایم ایف ءِ گور ءَ شتگ اَنت۔ آئی ءَ گشتگ کہ ترکی ءَ برآمدات ءِ سرءَ دلگوشی کتگ ءُ معیشت ءَ را دیمروئی داتگ۔ آئی ءَ گشتگ کہ 60 ءِ زمانگ ءَ ملک راستیں نیمگے ءَ رہادگ بوتگ بلے 70 ءِ زمانگ ءَ قومیانے ءِ پالیسی ءَ صنعتی عمل ءَ را آماچ کتگ۔ مزن وزیر ءَ گشتگ کہ مصنوعات ءِ ویلیوایڈیشن ءَ چہ معیشت ءَ را محکم کنگ بیت۔ آئی ءَ گشتگ کہ رسول کریم ﷺ ءِ ذات مبارک پہ مے حاترءَ نمونگ اِت۔ جدوجہد ء ُ محنت ءَ چہ سوبمندی حاصل بیت۔ شارٹ کٹ ءُ فراڈ ءَ چہ ایچ بوت ناکنت۔ مزن وزیر ءَ گشتگ کہ درسیں دُزءُ ڈُنگ یکجاہ بہ بنت، آیاں پہیل کنگ ءُ این آر او دیئگ ءُ من ء ُ گر کنگ یک ارزانیں کشک اِت بلے اے تباہی اِت۔ آئی ءَ گشتگ کہ حکومت نالج اکانومی ءِ گیش کنگ ءَ سرجم ءَ کمک کنت۔ لوٹاں کہ مزنیں وانگ ءُ زانگ ءُ پٹءُ پول ءِ سرءَ دلگوشی کنگ بیت۔ ایشی ءَ پیسر سائنس ءُ ٹیکنالوجی ءِ بنجاہی وزیر چوہدری فواد حسین ءَ مراگش ءَ گوں تران کتگ ءُ گشتگ کہ ٹیکنالوجی ءِ پڑ ءَ دیمروئی ءَ چہ راج دیمروئی کناں۔ حکومت ءَ 50 سال پد، وانگ ءُ وانگی ادارگ ءُ دیمپانی ءِ پڑآں دونیمگی نزیکی جوڑ کتگ۔ آئی ءَ گشتگ کہ فیصل آباد صنعتی زون ءَ 200 ایکڑ ءِ سرءَ میڈیکل سٹی جوڑ کنگ بوتگ۔مے باندات وانگ ءُ زانگ ءُ ٹیکنالوجی ءَ گوں بندوک اِنت۔