اسلام آباد۔ 16 اکتوبر (اے پی پی) بنجائی وزیر حوالکاری و شینکاری سینیٹر شبلی فراز پارینے کہ اپوزیشن نا دوآبہ و منافقت چلینگپک، مسلم لیگ (ن) و پیپلزپارٹی فیملی لمیٹڈ کمپنی ءُ، اوفتا موسمی نظریاتی پن آن قوم واقف ءِ، اوفتا فائدہ کبینی ٹی کمتی و قوم انا خیر خواہی اف تینا کرپشن ءِ اودیم کننگ نا ءِ۔ زرگزران و ادارہ غاتے بھس کروک آک، ملک ءِ پلوک آک، پارلیمنٹ اٹ دروغ تڑوک آک داسہ جمہوریت نا چیمپیئن جوڑ مسنو، مستین اسہ ایلو ءِ دُز دُز پاروک آتے پنجاب حکومت رومال ہم ایتے تانکہ او تینا مون ءِ ڈکنگ کیر، گوجرانوالہ اسٹیڈیم ءِ پُر کننگ کن اوفک اسٹیڈیم نا نیمہ غا اسٹیج جوڑ کرینو، تینا دور اٹی اوفک وونٹ انا شرف نا آخا نوٹ انا عزت نا خیال ءِ کریر، ننے ملک ءِ دُز آتا دوتیان کشوئی ءِ، اینو ملک اٹی کبینی ہم اوفتا پالیسی تا بھرم ءِ، مولانا فضل الرحمان نا مار کٹے تو سہی، تینٹ باایتے تو گچین کاریک غلط ءُ، عدالت آک اوفتا حق اٹ فیصلہ کیر تو سہی ورنہ غلط سمجھرہ، دا بے سہب مریرہ و اسُل دُوارہ پدی بننگ کپسہ، اوفتا سیاست چٹانے، ملک اٹ کبینی ءِ ولے جوان انگا وخت بننگ والا ءِ، بروک آ اِرا چار ہفتہ ٹی حالیت آتیٹی گچینی نظر بریک۔ اوداخیال آتا درشانی ءِ دوشنبے نادے آ ایوان بالا ٹی پالیسی بیان ترسا کرے۔ سینیٹر شبلی فراز پارے کہ درو ننا بہادر فوج انا کارندہ غاک شہید مسنو، اوفتے خراج عقیدت پیش کینہ، 19 سال انا اسہ غیر روایتی جنگ اسے تون سرسہبی اٹ مون تسنو و دا سفرداسکان برجاءِ۔ اوپارے کہ داوخت آ ہائبرڈوار برجاءِ و دانا بنداوی مسخت بے یخینی و مایوسی تالان کننگ نا ءِ، دا مایوسی و بے یقینی ننا ملک انا فائدہ ٹی اف و دا جنگ سیم تا محتاج اف۔ ہنداخاطرآن داجنگ اتون جنگ کننگ کن ننے بحیثیت اواری اٹ مقابلہ کروئی مریک۔ سینیٹر شبلی فراز پارے کہ ایوان بالا ٹی اپوزیشن باسک آتا تقریر آتیٹی دا تاثر تننگانے کہ دُن کہ داملک اٹی وخت اس ہم اوفک حکمرانی کتنو، حالانکہ تدوک آ چِل آن پنجا سال اسکان داملک اٹی حکومت کرسا کرینو، دا ہمو پارٹیک ءُ ہرافک ملک اٹ جمہوریت نا تشریخ ءِ تینا فائدہ غاتا رداٹ کرینو۔ اوفتے اِراتہائی اکثریت ہم ملا ہمووخت الس نا فائدہ کن ترمیم کننگ و ادارہ غاتے سوگو کننگ نا جاگہ غا 15 می ترمیم نا کمک اٹ تینے امیر المومنین جوڑ کننگ نا پلان کریر۔ اوپارے کہ اوفتا سوچ جمہوری اف، اوفتا سوچ آمرانہ ءِ، دا اِرا خاہوت آتا پبلک لمیٹڈ کمپنی تا نمائندگی ءِ کیرہ ولے ہراتم اوفتا پارٹنر شپ عمران خان تینا 22 سال انا جہد اٹ پرغا تو اوفک ملک انا فائدہ، جمہوریت و وونٹ انا عزت نا ہم خیال بسنے ولے تینا دور حکومت اٹ اوفک وونٹ انا عزت نا آخا نوٹ انا عزت نا خیال ءِ کریر۔ بنجائی وزیر پارے کہ اوفک منظم وڑاٹ ادارہ غاتے بھس کریر و تینا تینا مخلوق ءِ ہموڑے تولفیر تانکہ او اوفتا کمکار مننگ کیر، اینو دا واویلا کننگ ءُ کہ زرگزران ءِ انت مسنے، دا ہمو ملک ءِ ہراٹی چندی دور تیٹی نما حکومت مسنے۔
