اسلام آباد۔ 16 اکتوبر (اے پی پی) وزیر مملکت پارلیمانی امور علی محمد خان پارینے کہ الس ءِ جوان ءُ نہاد اسے آ دوائی تا فراوانی حکومت نا اولیت ءِ، مسکوہی حکومت نا غلط پالیسی تا سوب آن دوائی تا نہاد آتے کنزیومر پرائس انڈیکس اتون منسلک کننگا، داسہ دوائی جوڑ کروک کمپنیک حکومت نا موکل تننگ آن بیدس نہاد آتے ودفنگ کپسہ۔ جمعہ نادے آ ایوان بالا نا دیوان اٹی سینیٹر مشتاق و ایلوفتا چکاری نوٹس نا ورندی ٹی وزیر مملکت پارے کہ ہر پاکستانی ءِ معلوم مرے کہ دوائی تا نہاد آٹی ودکی انت اکن مسنے۔ جوان ءُ نہاد اسے آ دوائی تا فراوانی حکومت نا اولیت ءِ پیپلزپارٹی و مسلم لیگ نون نا حکومت داڑے رہینگانے۔ اوپارے کہ مسکوہی حکومت آک پاکستان نا الس نا گلہ ءِ فارماسیوٹیکل کمپنی تا دوٹی تسوسر و دوائی تا نہاد آتیا نظر شاغنگ نا بابت حکومت نا کڑد چٹاسس، وزارت جان جوڑی نا کنٹرول چٹنگ نا سوب آن کمپنیک دوائی تا نہاد آتے ودفیرہ۔ اوپارے کہ داسہ نن دوائی تا نہاد آتیا تینا کنٹرول ءِ بحال کرینن و دوائی تا نہاد آتے مرضی اٹ ودفنگ نا توننگ کن نوٹیفکیشن جاری کننگا، داسہ کس اس دوائی تا نہاد آتے ودفنگ کپک۔ علی محمد خان پارے کہ وزارت جان جوڑی تون دا معاہدہ طے مسوسس کہ کوویڈ۔ 19 اٹی دوائی تا نہاد آتے ودفنگپک۔ کنزیومر پرائس انڈیکس تون منسلک کننگ نا سوب آن دوائی تا نہاد آتے ودوئی ئس، دا مسکوہی حکومت فیصلہ کریسس ولے نن دوائی تا نہاد آتیٹی ودکی ءِ جولائی 2021ء اسکان تورینن۔ اوپارے کہ اینخو سال جون اٹی دوائی تا نہاد آتے ودوئی ئس ولے اکتوبر اٹ دافتے ٹی ودکی کننگانے۔ کالاموتیا نا اسہ ٹیبلیٹ اِرا روپئی ٹی کمپنی بہاکننگ آ آمادہ الوکہ ہرانا سوب آن اونا نہاد اٹی پنچ روپئی نا ودکی کننگانے۔ و داسہ ہفت روپئی اٹ ملنگ ءِ، نہاد آتے گچین کننگ نا کوشست کرینن تانکہ دا مارکیٹ اٹ ملر و اوفتا بلیک مارکیٹنگ مف۔ جون 2021اسکان دا 94 دوائی تا نہاد آتیٹی کمپنیک ودکی کپسہ، نن تو کمپنی تے پابند کرینن کہ او نہاد آتے ودفنگ آن مست وزارت آن موکل ہلیرہ۔ مستین داوڑ فیصلہ انت اکن کننگتو، دوائی جوڑ کروک کمپنیک پیناڈول آن ہلیس بھلن آن بھلن و کبین دوائی تا نہاد آتے ودفنگ آن مست حکومت آن موکل ہلنگ نا پابند ءُ۔
