اسلام آباد۔ 15 اکتوبر (اے پی پی) اقوام متحدہ ٹی پاکستان نا سفیر منیر اکرم جہانی برادری ءِ معلومدار کرینے کہ بھارت نا جارحانہ پالیسی تیان مچ آ دنیا نا امن و سلامتی خاص کر پاکستان ءِ خطرہ مون تروک ءِ۔ اوجنرل اسمبلی نا جہانی سلامتی و سلہہ غاتا چٹفنگ نا بارواٹ فرسٹ کمیٹی آن تران کرسا پارے کہ بھارت جارحانہ کارروائی تتون اوار اوار تدوک آ سال روایتی و غیر روایتی پوسکن آ سلہہ تیا 70 ارب ڈالر خڑچ کرے و بھارت مچ آ دنیا ٹی غٹ آن زیات جنگی سازوسامان و سلہہ دوئی کروک آ ملک آتیان اسٹ ءِ۔ پاکستانی سفیر منیر اکرم چارشنبے نادے آ عمومی شرہ ٹی بشخ ہلسا پارے کہ بھارت بحر ہند اٹ جوہری سلہہ اینٹی بیلسٹک میزائل و پوسکن آ جنگی سلہہ نصب کرینے۔ بھارت پاکستان آ اناگت جلہو کننگ کن تینا کولڈ سٹارٹ اپ ڈاکٹرائن ءِ فعال کرینے و پاکستانی سیم اتون اوار اوار کیہی بریگیڈز فوج خلسا چنکو کچ اسے ٹی جنگ انا بناءِ کرینے۔ وخت اس کہ داٹی ودی مروک آ بے چیٹی و فوجی مسابقت اٹ سویلی ایشیا و بحرہند انا امن وسلامتی ءِ مون تروک خطرہ غاتیٹی ودکی مسنے، سفیر منیر اکرم پارے کہ 2014ء ٹی وزیراعظم نریندر مودی نا بی جے پی۔ آرایس ایس ہندو انتہاپسند حکومت نا بناغان پد آن بھارت جھیڑہ غاتا ایسری، یا سلہہ غاتا کنٹرول و جنگ آن پاناد کننگ نا بارواٹ پاکستان تون ہروڑنا ہیت وگپ کننگ آن انکار کرینے۔ اوپارے کہ پاکستان راجی و اقتصادی شونداری نا دوئی کننگ کن امن و اسٹریٹجک سوگوی نا خواہندار ءِ و داڑآ سلنگ آ چرجوئی ٹی زمواری اٹ کاریم ہلنگ ءِ و سلہہ غاتا رُمب آن پاناد کننگ ءِ ولے ، ڈیہہ ٹی فریشان کن رکھی حرکت آتا رداٹ، سفیر اکرم پارے کہ پاکستان تینا سلامتی ءِ پک کننگ و دفاعی لائخی ءِ پورو وڑاٹ برقرار تخنگ کن غٹ المی گام گیج کیک۔ پاکستانی مندوب پارے کہ سویلی ایشیا ٹی ہمووخت اسکان امن و سوگوی مفک ہراتم اسکان کہ جموں و کشمیر نا بنداوی ویل ایسر مفک۔ اوپارے کہ پاکستان بڑزکو خلاٹی سلہہ غاتا رُمب انا توننگ و سلہہ غاتا چٹفنگ نا معاہدہ غاتیکن جنیوا ٹی مروک آ کانفرنس نا ہم مخ تفی ءِ کیک۔
