اسلام آباد۔ 15 اکتوبر (اے پی پی) وزیراعظم نا خصوصی کمکار قومی جان جوڑی ڈاکٹر فیصل سلطان پارینے کہ نرس و لیڈی ہیلتھ ورکرآتون باندات آتے ہیت وگپ اٹ ایسر کننگک۔ پنچ شنبے نادے آ نرس آتون مذاکرات آن پد میڈیا تون گپ وتران کرسا اوپارے کہ نرس آتا غٹ خواست آتے بنگونن ہرافتے جوانی اٹ ایسر کننگک۔ اوپارے کہ نرس آک ہرا خواست آتے ننا مون آ تخانو ای اوفتے نوٹ کرینٹ۔ اوپارے کہ کنا بننگ نا مسخت ہندائس کہ اوفتا ہیت ءِ بِننگے و ہُننگے کہ او داڑے برسا تینے ہم تکلیف اٹ شاغنگ ءُ وخت اس کہ اوکسر ءِ ہم تورینو۔ خصوصی کمکار قومی جان جوڑی پارے کہ داباندات آ ای غٹ سرجم آتے دوئی کرینٹ و داچرجوئی ٹی ڈاکٹر یاسمین راشد تون ہیت مہالو ہم مسنے و داسہ دُوارہ ہم کیوہ۔ اوپارے کہ لیڈی ہیلتھ ورکرآتا کنڈآن کنے عثمان بزدار تون ہیت کننگ نا پاننگانے ولے باندات ءِ ایسر کننگ نا کوشست جاری ءِ و وزیراعلیٰ پنجاب تون ہم ہیت کینہ۔ اوپارے کہ نرس و لیڈی ہیلتھ ورکرآتا خواست آک سہی و غلط مننگ نا بابت پورو معلومداری ہلنگ اُن و داٹی داہم ہُننگ انگ ءِ کہ ہراہرا خواست دُن ءُ ہرافتیا عملدرآمد کننگ مریک۔
