اسلام آباد۔ 15 اکتوبر (اے پی پی) بھارتی سینئر سفارتکار ءِ دفترخارجہ غا بٹنگسا 14 اکتوبر آ کوزہ گیر بھارتی فوج انا کنڈآن کنٹرول لین انا جندروٹ سیکٹر اٹی جنگ بندی نا خارتس خلاف ورزی تیا برانز ریکارڈ کننگا۔ بھارتی فوج انا خارتس سم کاری ٹی اِرا بیگناہ شاری ٹھپی مسر۔ پنچ شنبے نادے آ ترجمان دفترخارجہ نا رداٹ سینئر بھارتی سفارتکار ءِ دفترخارجہ غا بٹنگسا برانزی مراسلہءِ اونا دوٹی تس وپارے کہ کوزہ گیر بھارتی فوج ایل او سی و ورکنگ باؤنڈری نا پدریسہ خلاف ورزی کرسا آرٹلری، بھلو و خودکار سلہہ غاتا کمک اٹ لس شاری آبادی ءِ شست کننگ ءِ۔ بھارتی سفارتکار ءِ پاننگاکہ شاری آبادی تے دانستہ شست کننگ بھاز است ہسونی، انسانی عظمت ووقار، جہانی انسانی حق و جہانی انسانی کانود آتیان اسُل چپ ءِ۔ بھارت نا کنڈآن جنگ بندی ناداخلاف ورزی تیان علاقائی امن و سلامتی ءِ بھلا خطرہ مون تروک ءِ ہرانا بھرم سٹریٹجک غلطی نا دروشم اس پیش تمنگ کیک۔ بھارت اینخو سال اٹی 2530 وار خارتس جنگ بندی نا خلاف ورزی کرینے۔ ہراٹی 19 بیگناہ شاری شہید و 197 ٹھپی مسنو۔ بھارتی سفارتکار ءِ معلومدار کننگاکہ ایل او سی آ بے چیٹی ٹی ودکی آن بھارت مقبوضہ کشمیر اٹی انسانی حق انا بھلا خلاف ورزی و بیدادی آن جہانی چکار ءِ اسہ کنڈ کننگ کپک۔ بھارت آ زور شاغنگاکہ او اِرا ہزار مسٹ نا جنگ بندی نا معاہدہ نا پاسداری ءِ کے، جنگ بندی نا خلاف ورزی نا دا واقعہ غاتا جاست وپاست کرفے۔ بھارتی فوج ءِ جنگ بندی نا شرف نا پرمان کے، ایل او سی و ورکنگ باؤنڈری آ اونا رداٹ امن ءِ برقرار تخے و اقوام متحدہ نا سلامتی کونسل نا قرارداد آتا رداٹ بھارت اقوام متحدہ نا فوجی مبصرین(یو ای ایم او جی آئی پی) ءِ تینا کڑد ءِ ادا کننگ کن موکل ایتے۔
