اسلام آباد۔ 14 اکتوبر (اے پی پی) صدر مملکت ڈاکٹر عارف علوی پمز اٹی ضابطہ نا برخلاف تقرری آ بنجائی محتسب نا فیصلہ نا برخلاف پمز ہسپتال نا درخواست ءِ مسترد کرینے۔ چارشنبے نادے آ ایوان صدر نا میڈیا ونگ آن جاری بیان نا رداٹ صدر ملکت پمز ہسپتال ءِ تقرری نا عمل نا بابت رپورٹ 45 دے اٹی بنجائی محتسب ءِ پیش کننگ نا پرمان کرینے۔ اوضابطہ نا برخلاف تقرری کننگ آ انکوائری کننگ و رپورٹ جمع کرفنگ نا ہم پرمان کرینے۔ اومیتدار عاصم حنیف ڈرافٹس مین نا عہدہ کن درخواست تسوسس و نوشتہی امتحان اٹ 63 نمبر ہلسا اول پوزیشن ءِ ہلکوسس۔ عاصم حنیف ءِ انٹرویو ٹی 6 نمبر ترسا فیل کننگاسس۔ عاصم حنیف دا ناانصافی نا برخلاف بنجائی محتسب اٹ درخواست دائرکریسس۔ سماعت اٹی پت پاش مس کہ عاصم حنیف ءِ انٹرویو ٹی کم نمبر ترسا میرٹ لسٹ اٹ شیف گدریفسا نسخان تننگا۔ نوشتہی امتحان اٹ عاصم حنیف آن 15 درسد کم نمبر ہلوک آ اومیتدار ءِ انٹرویو ٹی زیات نمبر تننگا۔ ایلو اومیتدار نوشتہی امتحان اٹ 48 نمبر ہلک و انٹرویو ٹی 25 نمبر تننگا۔ عاصم حنیف نا تعلیمی قابلیت ہم ایلو اومیتدار آن زیات ئس۔ عاصم حنیف نا تعلیمی قابلیت ڈپلومہ آف ایسوسی ایٹ انجینئر اتون بی ٹیک آنرز ئس ایلواومیتدار نا تعلیمی قابلیت میٹرک اتون ڈپلومہ آف ایسوسی ایٹ انجینئر ئس۔ بنجائی محتسب انٹرویو نا عمل ءِ کالعدم گونداسس ہرانا سوب آن پمز بنجائی محتسب نا دا فیصلہ نا برخلاف صدر مملکت نا مون آ درخواست دائر کریسس۔
