اسلام آباد۔ 14 اکتوبر (اے پی پی) وزیر خارجہ شاہ محمود قریشی اقوام متحدہ انسانی حق کونسل نا گچین کاری تیٹی پاکستان نا نمان سفارتی سرسہبی آ مچ آ قوم ءِ مبارکباد پیش کرسا پارینے کہ اینو دنیا پاکستان نا کڑد ءِ قدر انا نظر اٹ ہرک، سرسہبی انسانی حق کونسل اٹ ننا 3 سال انا کارکڑد ءِ ہم نمان کیک۔ چارشنبے نادے آ تینا اسہ بیان اسے ٹی وزیر خارجہ پارے کہ پاکستان ءِ سفارتی پڑ آ نمان سرسہبی رسینگانے۔ پاکستان پیدوار برتری اٹ انسانی حق کونسل اٹ دُوارہ گچین مسنے، 191 آن پاکستان ءِ 169 وونٹ ملا۔ شاہ محمودقریشی پارے کہ اقوام متحدہ انسانی حق کونسل نا گچین کاری تیٹی ہر ریجن آن پاکستان ءِ مخ تفی ملانے، بااثر و بھلا ملک آک ہم پاکستان تون تفیر وخت اس کہ شون ہلوک ملک آک ہم پاکستان ءِ وونٹ تسنو۔ وزیر خارجہ تفنگ آ غٹ ملک آتا منت واری ءِ ہرفے و پارے کہ دا وونٹ انسانی حق کونسل اٹ ننا 3 سال انا کارکڑد ءِ ہم نمان کیک، اینو پاکستان نا کڑد ءِ دنیا قدر انا نظراٹ ہُرک۔ پاکستان نا شرف اٹ اسہ جوان ءُ ودکی اس مسنے، شاہ محمودقریشی پارے کہ مقبوضہ کشمیر اٹ انسانی حق انا خلاف ورزیک ودار۔ داوڑاٹ پاکستان نا دا ادارہ نا بشخ مننگ بھاز اہم ءُ سرسہبی اسے۔ دا گچین کاری تیٹی مخ تفی نا دوئی کننگ کن وزیراعظم عمران خان چندی ملک آتا سروک آتے چھٹی نوشتہ کرے مخدوم شاہ محمودقریشی پارے کہ ای بطور وزیر خارجہ، چندی ملک آتا وزیر خارجہ غاتون رابطہ کریٹ۔ ای یواین ڈویژن و جنیوا نا ٹیم ءِ مبارکبادی ایتیوہ۔
