اسلام آباد۔ 14 اکتوبر (اے پی پی) وزیراعظم نا خصوصی کمکار قومی سلامتی ڈاکٹر معید یوسف پارینے کہ پاکستان کس انا علاقائی جھیڑہ غاتیٹی نیام تمپک۔ نجی نیوز چینل تون گپ وتران کرسا اوپارے کہ پاکستان اسہ سمجھدار و زموار ءُ ریاست اسے و او مدام بھارت نا برخلاف سگ و سینہ نا درشانی ءِ کرینے ولے اگہ جنگ مسلط کننگا تو پاکستان اسہ وڑاسے نا ہم جارحیت ءِ سگپک۔ اوپارے کہ ہندوستان دہشت گردی نا بھلا سرپرست ءِ و نن دا حقیقت آن مچ آ دنیا ءِ معلومدار کرینن۔ ہندوستان تینا پالیسی تیان تینے تباہی نا کنڈآ درینے۔ ڈاکٹر معید پارے کہ دنیا ننا بیانیہ ءِ سرپندی نا بناءِ کرینے و حقیقت آن آگاہی نا دا چرجوئی برجاسلک۔ او مستی پارے کہ بھارت نا 5 اگست، 2019نا گام گیج آتے پدی ہلپننگ اسکان مقبوضہ کشمیر نا حالیت آک بھارت نا دوتیان پیش تمک۔ اوپارے کہ نن تینا نظریہ بھاز جوان وڑاٹ پیش کرینن کہ پاکستان ڈیہہ ٹی امن کن سلوک ءِ۔ ساڑی بھارتی حکومت ہندو توا نا نظریہ غا عمل کننگ ءِ ہرا تینا قومی سیم تیان مون آ ہنسا کنٹرول تالان کننگ خواہک۔ مچ آ ڈیہہ تون اوار چین، اوغانستان و نیپال بھارت نا دا ناپاک عزم ءِ پہہ مسنو و اوفک دا بھارتی عزم انا برخلاف گام گیج ہم کرینو۔
