کوئٹہ۔ 14 اکتوبر (اے پی پی) وزیراعلیٰ بلوچستان جام کمال خان پارینے کہ حکومت تعلیم و جان جوڑی نا بشخ اٹی گچینی اتنگ کن کیہی ڈٹ آتا بناءِ کرینے، اینخو نا سال پوسکن آ کالج، پولی ٹیکنک انسٹیٹیوٹ، بی آرسیز و ایلو ڈٹ آتیا پنچ ارب روپئی خڑچ کننگ انگ ءِ ہنداوڑ ارب آ روپئی نا خڑچ آن صوبہ ٹی کیہی پوسکن آ ہسپتال و بنداوی جان جوڑی نا ہند آتا تفنگ نا بناءِ کننگ انگ ءِ۔ داہیت ءِ او چارشنبے نادے آ تینا ٹویٹ اٹی پارے۔ وزیراعلیٰ بلوچستان جام کمال خان پارے کہ داوڑ بلوچستان نا علاقہ تفتان ضلع چاغی ٹی 25 کٹ آتا ہسپتال تربت اٹی 20 کٹ انا ہسپتال، ضلع خضدار اٹی کارڈیک سینٹر نا جوڑ کننگ انگ ءِ وخت اس کہ نصیر آباد اٹی 20 کٹ انا پوسکن ءُ ہسپتال اس کوئٹہ ٹی گیسٹرو انٹرولوجیکل انسٹی ٹیوٹ نا جوڑ کننگ ضلع واشک اٹی 25 کٹ آتا پوسکن ءُ ہسپتال جوڑ کننگک۔ اوپارے کہ ژوب اٹی 20 کٹ انا پوسکن ءُ ہسپتال اس، نصیر آباد اٹی پوسکن آ ہسپتال نا تفنگ ضلع زیارت اٹی تحصیل ہیڈکوارٹر ہسپتال نا پوسکنی و ودکی فاطمہ جناح ہسپتال نا ودکی، مری آباد اٹی 30 کٹ آتا ہسپتال اوار ءِ۔ وزیراعلیٰ بلوچستان جام کمال خان مستی پارے کہ ضلع لورالائی ٹی مسن تیکن بورڈنگ اسکول نا جوڑ کننگ بلوچستان نا 15 ضلع غاتیٹی ڈیجیٹل لائبریری جوڑ کننگ انگ ءِ۔ پنجگور، قلعہ عبداللہ ٹی بی آر سی نا جوڑ کننگ ہم ڈٹ آتیٹی اوار ءِ۔
