کوئٹہ۔ 14 اکتوبر (اے پی پی) بنجائی وزیر دفاعی پیداوار زبیدہ جلال تون اسلام آباد اٹی وزیراعلیٰ بلوچستان نا کوارڈینیٹر و نائب صدر بلوچستان عوامی پارٹی میر عبدالرؤف رند، مکران نا پنی آ سیاسی و راجی شخصیت میر ابوبکر دشتی و بلوچستان عوامی پارٹی کیچ انا جنرل سیکرٹری میر زبیر رند ئسک اوڑدہی کریر، اوڑدہی ٹی اپوزیشن جماعت آتا کنڈآن گچین جمہوری حکومت نا برخلاف برانز نا سیاست ءِ کرپشن بچفنگ نا بے سہب مہم نا بشخ گوندسا پاننگاکہ اپوزیشن جماعت آتے الس نا ہچ ءُ غم اس اف دا بیرہ تینا مسکوہی کرپشن ءِ بچفنگ کن یکجا مسنو ہراتم کہ کرپشن نا برخلاف جاست وپاست بناکیک تو دا جماعت آک اسہ ایلو تون ملسا جمہوریت نا شئیر ءِ خلیرہ، پی ڈی ایم نا جوڑ کننگ جمہوریت کن آخا بلکن کرپٹ زموار آتے بچفنگ کن ءِ، دا ہمو زموارآک ءُ ہرافک تاریخی کرپشن و بدعنوانی آ الس 2018ء نا لس گچین کاری تیٹی مسترد کرینے داسہ دا تینا پلوک آ دولت ءِ بچفنگ کن نت و دُوخلنگ ءُ ۔ اوداہیت آ حیرت نا درشانی ءِ کرے کہ بلوچستان اٹ نوکاپ مرے یا زمی جمب، قدرتی آفت اس مرے یا طوفان، ساڑی آ کرونا مرے یا پین دین اس اپوزیشن اسہ جاگہ اس ہم نظر بفک۔ ولے ہراتم اوفتا فائدہ غاک خطرہ غاتیٹی تمرہ تو اوفتے بلوچستان یات بریک دا غٹ پوائنٹ اسکورنگ و کرپشن ءِ ڈکنگ نا بے سہب کوشست ءِ ہرادے بلوچستان نا الس مسترد کیرہ انتئے کہ داسہ بلوچستان بدل مسنے بلوچستان نا الس جوان و خراب اٹ تمیز کننگ چاہک۔ بلوچستان باشعور مسنے الس نا سوچ و فکر بدل مسنے الس ءِ داسہ پین ریفنگ مفک، ہمو غٹ اپوزیشن جماعت آتے بلوچستان نا الس مدام آزمائفسا کرسا بسنو۔ ساڑی بنجائی و صوبائی حکومت آک بلوچستان ءِ شونداری نا کسر آ شاغنگ کن مربوط پروگرام اس بناکرینو و بلوچستان نا پسماندہ علاقہ غاتا شونداری کن جامع پیکج اسے نا منظوری ءِ تننگ انگ ءِ ہنداخاطرآن بلوچستان نا الس بلوچستان نا شونداری نا برخلاف اڑاند شاغوک آتے رد کرسا ساڑی حکومت نا شونداری و شونہالی نا پروگرام تون سلوک ءُ داٹی بلوچستان عوامی پارٹی مکران ڈویژن نا آرگنائزر میر عبدالرؤف پارے کہ مکران ضلع گوادر و ضلع پنجگور اٹ سرسہب ورکرز کنونشن و ضلعی گچین کاری تیان پد ضلع کیچ اٹ ہم انٹراپارٹی الیکشن جمہوری وڑاٹ پبی وڑاٹ کرفنگک و پارٹی ءِ شیفکو کہول آ الس اٹ پین منظم کننگک، میر عبدالرؤف رند پارے کہ تدوک آ دے اونا سی پیک اتھارٹی نا چیئرمین لیفٹیننٹ جنرل (ر) عاصم سلیم باجوہ تون خصوصی اوڑدہی مس ہراٹی مکران نا شورش زدہ علاقہ غاتیٹی انفراسٹرکچر نا بحالی ، ری ویمپنگ و پوسکن آانفراسٹرکچر نا تفنگ تون اوار ایلو اجتماعی باندات آتیا گپ وتران کننگا۔ دا شورش زدہ علاقہ غاتیا خصوصی فوکس کننگ آ امنا کننگانے ہراڑآن بھاز زوت شورش زدہ علاقہ غاک شونداری نا دنگ اٹ اوار مریرہ۔
