اسلام آباد۔ 14 اکتوبر (اے پی پی) وزیر خارجہ شاہ محمود قریشی پارینے کہ پاکستان بھارتی غیرکانودی مقبوضہ جموں و کشمیر اٹی بھارتی بیدادی و جارحیت نا باندات ءِ اقوام متحدہ نا انسانی حق کمیشن نا فورم اٹ ہرفک۔ چارشنبے نادے آ میڈیا تون گپ وتران کرسا وزیر خارجہ پارے کہ انسانی حق کمیشن کونسل نا دُوارہ گچین کاری ننے دا چرجوئی ٹی اسہ جتا ءُ موقع اس فراوان کرینے۔ شاہ محمود قریشی پارے کہ بھارتی غیر کانودی مقبوضہ جموں و کشمیر ہُشنگ انگ ءِ۔ و ہموڑے مواصلات نا بندش تون اوار چندی چم آتا کمک اٹ مخلوق نا توار ءِ توننگ نا کوشست کننگ انگ ءِ۔ اوپارے کہ داسہ وخت اس کہ بھارت آزاد مبصرآتے مقبوضہ علاقہ غاتا دورہ ءِ کننگ نا موکل تفننگ ءِ۔ ہنداخاطرآن کشمیری تا توار بڑز کننگ کن انسانی حق کونسل اسہ جوان ءُ فورم اسے۔ وزیر خارجہ داعزم انا درشانی ءِ کرے کہ پاکستان مظلوم کشمیری الس ءِ حق خودارادیت نا حق اٹ جہد اٹ اخلاقی، سفارتی و سیاسی مخ تفی ءِ برجاتخک۔ شاہ محمود قریشی پارے کہ اقوام متحدہ نا انسانی حق کونسل اٹی ننا ایلو اولیت آتیٹی دنیا ءِ اسلاموفوبیا غان مون تروک خطرہ نا بارواٹ معلومدار و مسلم امہ نا ویل آتے تالان کننگ نا ءِ۔
