کوئٹہ۔ 10مئی (اے پی پی) وزیراعلیٰ بلوچستان نا صوبائی سلاہکار معدنیات و قدرتی وسیلہ حاجی محمد خان لہڑی پارینے کہ اقتصادی راہداری ڈٹ انا پوروی آن شون نا کسر آک ملنگرہ۔ ملک و صوبہ ٹی بے روزگاری چٹک شون نا پین کسر آک ملنگرہ، شون نا مخالف قوت آتا غٹ سازش آتے بے سہب کینہ، امن نا اڈتننگ ننا حکومت نا اولین اولیت آتے ٹی اوارے۔ داخیال آتا درشانی ئِ او ”اے پی پی“ تون ہیت و گپ کریسہ کرے۔ صوبائی سلاہکار پارے کہ مسلم لیگ (ن) ملک اٹی انقلابی بدلی اس اتنگ کن ہرامیگاپروجیکٹس آتا بنائِ کرینے اوڑآن سوگو شون و جوڑجاڑ نا چرجوئی نا بناءمسنے۔ اوپارے اقتصادی راہداری ڈٹ انا پوروی آن شون نا کسرآک ملنگرہ ، ملک و صوبہ ٹی بے روزگاری چٹک و پین شون نا کسر آک ملنگرہ۔ اوپارے کہ ننا سیکورٹی ادارہ غاک پوروی وڑاٹ فعال ئُ و تینا جان تے ندر کریسہ الس نا جان و مال انارکھ و صوبہ ٹی امن نا اڈتننگ ئِ باوری جوڑ کننگ اُن۔ حاجی محمد خان لہڑی پارے کہ نن حقی وڑاٹ علاقہ نا جوڑ جاڑ و شون و الس نا خذمت کن جہد کننگ اُن، وزیراعلیٰ بلوچستان نواب ثناءاللہ خان زہری صوبہ نا پسماندگی و احساس محرومی تا چٹفنگ کن ہروڑنا گام گیج کننگ ئِ۔ اومستی پارے کہ پاکستان مسلم لیگ نا حکومت حقی وڑاٹ الس نا خذمت آ باور کیک۔
