اسلام آباد۔ 10مئی (اے پی پی) قومی اسمبلی ئِ حکومت نا کنڈآن پاننگانے کہ ملازمت نا وخت آ کذیت کروک آ ملازم آتا بابت وزیراعظم محمد نواز شریف نا پارت آ پیکج آ نظرثانی کننگانے ہراٹی مست آن زیات آسراتی تننگانے، متوفی ملازم آتا چناتے آخبتی ملازمت تننگ نا سلاہ غا ہم حکومت غور کیک۔ سے شنبے آ قومی اسمبلی ٹی خالدہ منصور نا سرکاری ملازم آتا بابت ملازمت نا وخت آ کذیت پیکج نا رداٹ آخبتی ملازمت فراوان کپننگ آن بابت توجوہ مبذول نوٹس نا ورندی ئِ ترسا وزیر مملکت شیخ آفتاب احمد پارے کہ ہرابندغ آک ہم ملازمت نا وخت آ کذیت کیرہ یخینی وڑاٹ اوفتا پدسلوک آک بھاز مشکلات آتا گواچی مریرہ۔ وزیراعظم داپیکج آ نظرثانی کرسا زیات آن زیات آسراتی تسنے۔ گریڈ اسٹ آن 12اسکان نا ملازم آتا زرئِ دوگنا کننگانے۔ ہراوخت آ ایماندار ملازم نا چنائِ کنٹریکٹ آ ملازمت تننگک ہراٹی ودکی ہم کننگک ۔ اوکان گڈ اودے آخبتی ملازمت اٹی ہم بدلیفنگک۔ خالدہ منصور پارے کہ متوفی ملازم آتا چناتے آخبتی ملازمت تننگ نا پالیسی اس جوڑ کننگے۔ وزیر مملکت شیخ آفتاب احمد پارے کہ حکومت پیکج اٹی متوفی ملازم نا پنداوڑی اونا ریٹائرمنٹ نا وئی پوروی مننگ اسکان ادا کننگک۔ چناتا ملازمت اوکان گڈ آخبتی ہم کننگک۔ شکیلہ لقمان پارے کہ 2014ءٹی متوفی ملازمین آتا بجٹ زیات ئس۔ داسا داکم کننگانے۔ وزیر مملکت شیخ آفتاب احمد پارے کہ بجٹ کم متو اوٹی ودکی کننگانے۔ سلاہ اس کہ گریڈ اسٹ آن 16اسکان نا آخبتی ملازمت تننگے۔ نن حکومت ئِ پالیسی اس جوڑ کننگ نا سلاہ ایتنہ۔
