نیویارک ۔ 05مارچ(اے پی پی) پاکستان اقوام متحدہ نا سلامتی کونسل اٹی گچین علاقائی نمائندگی ءِ پک کننگ کن بے آخبتی باسک آتا کچ ءِ ودفنگ آ زور شاغانے ۔ اقوام متحدہ ٹی پاکستانی سفیر منیر اکرم سلامتی کونسل ءِ پین گچین، نمائندہ ، شفاف و جوابدہ کننگ کن دیرپا اصلاحات آتا بابت آن بین الحکومتی مذاکرات اٹی گپ و تران کرسا پارے کہ 1945ء ٹی سلامتی کونسل اقوام متحدہ نا باسک ملک آتا 20 درسد نمائندگی ءِ کریرہ ۔ اوپارے کہ سلامتی کونسل اینو بیرہ 8 درسد نا نمائندہ ءِ ہرانا سوب آن کونسل نا کم و ود اسہ تہائی باسک آتا ہچ ءُ کڑد اس سلتنے ، ہنداسوب آن بریبری نمائندگی ءِ پک کننگ کن کونسل نا کچ ءِ ودفسا باسک ملک آتے کن پوسکن آ گمان ودی کروئی مریک ۔ کونسل نا آخبتی باسک آتا کڑد آ است جم مفننگ نا ذکر ءِ کرسا منیر اکرم پارے کہ بے آخبتی باسک آتے ٹی ودکی وعلاقائی نمائندگی کن جمہوری طرز گچین کاری نا قابل قبول فارمولہ ءِ تینا کننگے تانکہ کونسل سہی وڑاٹ غٹ ملک آتا جوان سہی نمائندگی ءِ کننگ کے ۔ پاکستان سفیر اقوام متحدہ نا چارٹر نا حوالہ ءِ تس ہراٹی جغرافیائی تقسیم نا بنداو آ بریبری نمائندگی نا اصول نا ہیت ءِ کننگانے ۔ اوپارے کہ ودفوک آ سلامتی کونسل اٹی ودکی 10 نشست ہر ڈیہہ نا باسک ملک آتے ٹی بایدے بریبر تقسیم مرے ۔ منیر اکرم پارے کہ افریقہ نا دا موقف ءِ کہ اودے کونسل کن تینا نمائندہ غاتا پنداری نا حق ءِ تننگے تانکہ او ڈیہہ ءِ اجتماعی وڑاٹ جوابدہ ہم مرے ۔ دا نقطہ نظر نا اطلاق غٹ ڈیہہ تیا بایدے مرے ولے اوداہیت آ است ہسونی نا درشانی ءِ کرے کہ پڑک فور انا کنڈآن افریقی ملک آتا علاقائی پوزیشن نا مخ تفی ءِ کرسا تینا ڈیہہ تیٹی دا اصول نا نفی ءِ کننگ انگ ءِ ۔ اوپارے کہ دُن تو نن آخبتی باسک آتے ٹی ودکی نا حق اٹی افن ولے دا خوانہ کہ ہر ڈیہہ ءِ سلامتی کونسل اٹ تینا نمائندہ گدریفنگ نا اختیارتننگے ۔ اوپارے کہ لچکدار و مساویانہ اصول نا بابت آن یو ایف سی نا سلاہ آن افریقی یونین، عرب ملک آک و او آئی سی کون آ علاقائی پڑک آتا گیشتر نمائندگی ممکن مننگ کیک انتئے کہ دا سلاہ نئے بیرہ داخت آ بلکن آخبت اٹی ہم حقیقت پسندانہ ءِ ۔ یات سلے کہ سلامتی کونسل اٹی اصلاحات کن بین الحکومتی ہیت وگپ انا بنافروری 2009ء ٹی مسوسس ۔ دا مذاکرات اٹی کونسل نا رکنیگ ، توسیعی کچ، علاقائی نمائندگی ، ویٹوپاور، وڑوڈول و جنرل اسمبلی آن تعلق آ شرہ مننگ ءِ ۔ کونسل ءِ ودفنگ نا بابت عمومی امنائی آن پد ہم باسک ملک آک تقسیم نا گواچی ءُ ۔
