اسلام آباد۔ 09مئی (اے پی پی) وزیراعظم نا سلاہکار خارجہ امور سرتاج عزیز پارینے کہ پاکستان قدیم تہذیبی میرات آتا امین مننگ نا حیثیت آن خڑکی علاقائی تعلقداری تے کن بھلو وارخواہی اس پیش کیک۔ دوشنبے آ وزارت خارجہ ٹی وزیر اطلاعات ونشریات پرویز رشید تون اوار مسہ دے ئی قدیم پاکستان نمائش نا افتتاح ئِ کرسا اوپارے کہ دا نمائش نا مسخت دنیا ئِ پاکستان نا عظیم دودربیدہ میرات آن روشناس کرفوئی ئِ۔ اوپارے کہ قدیم پاکستان نمائش اٹی نہ صرف نوادرات آتا نمونہ تخنگانے بلکن اوٹی قدیم خلقت آتا تاریخ ئِ بیان کننگانے ہراک دا ملک انا مرغزار، کھیت ، مش و پٹ آتے ٹی تینا زند ئِ تدیفیر ، دنیا نا دا بشخ انا خلقت آک انسانی تہذیب آ بھلو نخش اس ہلانو۔ اوپارے کہ پاکستان سویلی ایشیائ، نیامی ایشیاءو دیکی ایشیا نا سنگم آ واقع ئِ ہرا دودربیدہ نا مون آ دننگ نا کمک اٹ علاقائی تعلقداری تے ٹی اہم کڑدادا کننگ کیک ، خارجہ امورنا بارواٹی وزیراعظم نا خصوصی کمکارطارق فاطمی پارے کہ پاکستان نا قدیم تہذیب سگ و بردبارآ مبنی ئِ۔ اوپارے کہ سگ و دودوربیدہ تہذیب مننگ نا حیثیت آن داننا زمہ واری ئِ کہ نن تینا دودوربیدہ میرات آتے مون آ دین، سیکرٹری خارجہ اعزاز احمد چوہدری پارے کہ دنیائِ داڑآن ہفت ہزار سال متکن نایاب و قیمتی تہذیب نا بارواٹی موقع ملک۔ او سفیر آتا تینا تینا ملک آتے ٹی پاکستان نا قدیم تاریخ نا مون آ دننگ و تالان کننگ کن دننگا نمائش آتا اڈتننگ اٹی بھاز است خواہی نا ستائِ کرے ، نمائش اٹی اسلام آباد اٹی رہینگوک سفیر و صنعت کار آک شرکت کریر۔ دا نمائش 11مئی اسکان برجاسلک۔
