اسلام آباد۔ 06مئی (اے پی پی) صدر مملکت ممنون حسین اومیت ظاہر کرینے کہ اوغانستان اٹی مفاہمت کن چار جہتی رابطہ رڑ نا کوشست آک ثمر آور ثابت مریرہ و ڈیہہ ٹی بھاز زوت حالیت آک گچین مریرہ۔ اوداہیت ئِ پاکستان اٹی کینیڈا نا سبکدوش مروک آ ہائی کمشنر ہیتھر کروڈن تون جمعہ آ ایوان صدر اٹی ہیت و گپ کرسا پارے۔ صدر پارے کہ پاکستان ڈیہہ ٹی امن و سوگوی کن پبی مساعی کننگ ئِ و اونا کوشست آتا مثبت نتیجہ دوئی مننگ ئِ۔ اوپارے کہ آپریشن ضرب عضب تقریباََ 90درسد ہدف دوئی کرینے و عنقریب پورو سرسہبی دوئی مریک ہراڑآن ڈیہہ ٹی سوگوی ودی مریک۔ اوپارے کہ پاکستان اٹی نیاڑی وچناتا تعلیم آ خصوصی توجوہ تخنگ انگ ئِ و نیاڑی تے بااختیار جوڑ کننگ کن کیہی ڈٹ آتیا عملدرآمد کننگ انگئِ۔ صدر پاکستان اٹی تعلیم نا بشخ اٹی کمک فراوان کننگ آ کینیڈا نا حکومت نا منت واری ئِ ادا کرسا زورشاغا کہ کینیڈائِ ہموڑے تعلیم نا خواہشمند پاکستانی طالب علم آتے کن ویزا ٹی نرمی آغور کروئی مرے۔ اوپارے کہ پاکستان نیاڑی تے بااختیار جوڑ کننگ نا ڈٹ آتے ٹی کینیڈا نا کمک نا خیر مقدم ئِ کیک۔ صدر ممنون حسین پارے کہ پاکستان و کینیڈا نا نیام اٹ خوشگوار تعلقداریک اریر ہراوخت انا تدینگ انگ تون سوگو مننگ ئُ۔ او سبکدوش مروک آ ہائی کمشنر کن نیک خوائش آتا ہم درشانی ئِ کرے۔ کینیڈا نا سبکدوش مروک آ ہائی کمشنر پارے کہ پاکستان اٹی حالیت ترندی اٹ گچین مننگ ئُ۔ پاکستان اٹی بحیثیت ہائی کمشنراوناسفارتی اڈکننگ بھاز مفید و آرام دہ مس۔
