اسلام آباد۔ 06مئی (اے پی پی) صدر مملکت ممنون حسین پارینے کہ ملک اٹی جمہوریت سوگو مننگ ئِ و مقننہ عدلیہ و انتظامیہ ہم آہنگی اٹ کاریم کننگ ئُ۔ داہیت ئِ صدر مملکت دولت مشترکہ پارلیمانی ایسوسی ایشن نا سیکرٹری جنرل اکبر خان تون ہیت وگپ کرسا پارے ہراجمعہ آ ایوان صدر اٹی اوڑتون اوڑدہی کرے۔ صدر مملکت پارے کہ ملک سہی سمت آ روان ئِ و وخت تدینگ انگ تون اوار اوار پاکستان اٹی جمہوریت پین پختہ مریک۔ اوپارے کہ جمہوریت و گچین طرز حکمرانی ملک انا جوڑ جاڑ و شون اکن الم ئِ ، داچرجوئی ٹی ساڑی آ حکومت راج انا غٹ تپہ غاتے کن انسانی حق انا فراوانی ئِ باوری جوڑ کننگ ئِ۔ ہنداوڑ حکومت نیاڑی تے ملک انا شون و شونہالی ٹی کڑد ادا کننگ نا است بڈی ئِ کننگ ئِ۔ اومستی پارے کہ اسلام و قائد اعظم نا فرمودات آتے مون آ تخسا حکومت غٹ اقلیت آتے راج انا اسہ وڑ حق تننگ کن گام گیج کننگ ئِ۔ صدر مملکت پارے کہ پاکستان دہشت گردی نا چٹفنگ کن پرعزم ئِ و ملک اٹی امن و ایمنی نا بحالی کن آپریشن ضرب عضب سرسہبی اٹ جاری ئِ۔ اودا عزم ئِ دُوارے پارے کہ آپریشن ضرب عضب آخریکو دہشت گر دانا چٹفنگ اسکان برجاسلک۔ او مستی پارے کہ آپریشن ضرب عضب نا نتیجہ ٹی زرکار آتا پاکستان آ پت بحال مننگ ئِ۔ صدر مملکت پارے کہ دولت مشترکہ نا ملک آک ہم پاکستان نا پرکشش لبرل زرکاری پالیسی آن فائدہ ہرفسا توانائی، انفراسٹرکچر و ایلو بشخ آتے ٹی زرکاری کیر۔ اومستی پارے کہ دولت مشترکہ نا ملک آتے تعلیم نا بشخ اٹی اسہ ایلو نا آزموندہ غاتیان فائدہ ہرفنگ کن ڈل آتا کہول آ زیات آن زیات بایدے درشان مرے۔ صدر مملکت ممنون حسین پارے کہ پاک چین اقتصادی راہداری ڈٹ نہ صرف پاکستان کن شونہالی نا پوسکن ئُ باب اس ثابت مریک بلکن ڈیہہ نا غٹ ملک آتا نیام اٹ رابطہ غاتا گچینی نا سوب ہم جوڑ مریک۔ صدر مملکت اکبرخان ئِ دولت مشترکہ پارلیمانی ایسوسی ایشن نا ہفت میکو سیکرٹری جنرل نا عہدہ سنبھالنگ آ مبارکبادی تس ودا اومیت نا درشانی ئِ کرے کہ او پاکستان نا دولت مشترکہ نا ملک آتون پارلیمانی کہول آ تعلقداری تے مون آ دننگ اٹی کلیدی کڑد ادا کیک۔ داوخت آ اکبر خان سیکرٹری جنرل سی پی اے پارے کہ پاکستان او ملک آتیان ئِ ہرانا او سیکرٹری جنرل نا عہدہ سنبھالنگ آن پد دورہ ئِ کننگ ئِ۔ اونا دورہ پاکستان پاکستانی الس تون یکجہتی نا درشانی ئِ۔
