سکھر۔06مئی (اے پی پی) وزیراعظم محمد نواز شریف جمعہ آ لاہور کراچی موٹروے نا سکھر ملتان سیکشن نا بنداو ئِ تخا۔ اوکان مست سکھر آ بننگ آ وزیراعلیٰ سندھ سید قائم علی شاہ سکھر بالی پٹ آ وزیراعظم نا خیرمقدم ئِ کرے ۔ وزیرمملکت عبدالحکیم بلوچ و ایلو بڑزکو کمامدار آک ہم داوخت آ ساڑی ئسر۔ دا ڈٹ چین پاکستان اکنامک اقتصادی راہداری نا بشخ اسے ہرادے وزیراعظم نا پارت آ کراچی ئِ پشاور تون موٹرویز نا نیٹ ورک نا کمک اٹ منسلک کننگ کن بناءکننگانے۔ سکھر ملتان موٹروے 393کلومیٹر سریس مریک و دا قومی اہمیت ناحامل ڈٹ اسے۔ ملتان آن شروع مرسا دا 6لین موٹروے جلالپور پیر والا ، احمد پور شرقیہ،اوباڑہ ، پنوں عاقل آن مرسا سکھر اسکان کاہک۔ ڈٹ انا رداٹ دریائے ستلج آ اسہ بھلو پول اسیتون اوار 54پول جوڑ جاڑ کننگک وخت اس کہ موٹروے نا دا سیکشن اٹی 12سروس ایریاز ، 10ریسٹ ایریاز،11انٹر چینج، 10فلائی اوورو 426انڈرپاس مریرہ۔ داموٹروے نا جوڑ جاڑ آن سندھ و پنجاب نا نیام اٹ مواصلاتی رابطہ غاک ترند مریرہ و گاڈیک بھاز کم وخت اٹی تینا مزل آ سرمریرہ۔ دا ڈٹ چین نا مالی کمکاری آن پورو کننگک۔ دانا ٹھیکہ ئِ میسرز چائنہ اسٹیٹ کنسٹرکشن انجینئرنگ کارپوریشن ئِ تننگانے۔
