اسلام آباد۔ 18 ستمبر (اے پی پی) صدر مملکت ڈاکٹر عارف علوی تون اقوام متحدہ نا پاپولیشن فنڈ (یو این ایف پی اے) نا کنٹری ڈائریکٹر لینا محمود موسیٰ چارشنبے نادے آ داڑے ایوان صدر اٹی اوڑدہی کرے۔ داوخت آ صدر مملکت پارے کہ اسہ ملک اس ہم وسیلہ غاتا مقابلہ ٹی زیات ودوک آ آبادی نا سوب آن شون ہلنگ کپک۔ حکومت آبادی نا تالان مننگ ءِ توننگ کن سنبرینگوک ءِ۔ داہیت اکن راج انا غٹ تپہ غاتے فعال کننگ انگ ءِ۔ صدر مملکت پارے کہ او اسلامی نظریاتی کونسل ءِ دا پارت کرینے کہ او زالبول نا میرات خور انا کمتی و آبادی ٹی ودکی کون آ راجی ویل آتیان الس ءِ معلومدار کننگ کن تینا پلیٹ فارم ءِ کاریم اٹ اتے۔ اوپارے کہ حمل اٹی مناسب وقفہ مفننگ نا سوب آن خور انا کمتی کون آ ویل آتا مون تروئی تمک، ساڑی حکومت ہمو کسب کار زالبول ہرا چناتا ولفنگ نا سوب آن اُراتیا پیش تمپسہ ہمو زالبول آتے اوفتا درگہ غا ملازمت آتا وارخواہی فراوان کننگ کن خصوصی چکار کرینے۔ پاکستان و یو این ایف پی اے نا کنڈآن 8می کنٹری پروگرام آ سرسہبی اٹ عملدرآمد آ است جمی نا درشانی ءِ کرسا اواومیت ظاہر کرے کہ ساڑی آ کنٹری پروگرام 2018آن 2022 گچین خاہوتی ڈٹ بندی زالبول آتے واکدار کننگ، گچین جان جوڑی نا آسراتی و ورناتے زرکاری نا گچین وارخواہی فراوان کیک۔ اوپارے کہ پاکستان یو این ایف پی اے تون خڑکی تعلق نا حامل ءِ و داڑان مست زالبول سروک ڈاکٹر نفیس صادق نا تعلق پاکستان آن ئس۔ اوساڑی آ مردم شماری ٹی یو این ایف پی اے نا کمک و تکنیکی کمکاری نا ستاءِ کرے۔ لینا محمود موسیٰ ویل آتیا صدر مملکت نا گہرے علم انا ستاءِ کرسا پارے کہ اودے صدر مملکت نا تزویراتی ویژن آن پبی فائدہ مریک۔ او صدر آن امنا کرے کہ ودوک آ آبادی نا توننگ کن ہندی قدر و روایت آتیا پبی نظر تخنگے داکان بیدس درکار نتیجہ دوئی مننگ مفک۔ صدر مملکت یو این ایف پی اے نا انڈر سیکرٹری جنرل ڈاکٹر نتالیہ کینم نا کنڈآن نیروبی سروک دیوان اٹی سلہ غا اونا منت واری ءِ ہرفسا دا سرسہبی کن نیک است خواہی تا درشانیءِ کرے۔
